Arben Malaj, ish-ministër i Financave në qeveritë socialiste, ish-deputet dhe një nga figurat kryesore të PS-së ndër vite, vijon përplasjen dhe akuzat në drejtim të kryebashkiakut të Tiranës, Erjon Veliaj.
Në javët e fundit, Malaj ka shprehur kritika të forta në drejtim të Veliajt, por edhe qeverisë Rama, ndërsa përmes rrjeteve sociale ai shprehet se po lufton kundër babëzisë dhe arrogancës.
Malaj paralajmëron se betejën me Bashkinë e drejtuar nga Veliaj do e vazhdojë në gjykatë, madje deri në Gjykatën Kushtetuese, për t’i dhënë banorëve të kryeqytetit atë që meritojnë, sa herë që bashkia apo qeveria abuzon me të drejtat elementare të tyre.
Postimi i Arben Malaj
Pas peticionit tonë vetëm sot morëm përgjigje se për tre vite duhet të përzihemi nga parkimi si resident për një projekt privat.
Kompania private paguan taksë për infrastrukturën. Atë taksë e paguajnë edhe qytetarët tek çmimi i ndërtesës. Bashkia ta ndajë se kujt ligjërisht i takojnë të kompensojë për 216 milion lekë ( jo të reja) residentët.
Kjo përgjigje na hap rrugë për gjykim fillimisht në gjykatën administrative dhe më vonë në atë kushtetuese.
Bazuar në njohuritë dhe ekspertizën time profesionale, banorët do ta fitojnë këtë të drejtë. Këtë të drejtë nuk do ta fitojmë vetëm ne por gjithë banorët e Tiranës dhe në të gjithë Shqipërinë, sa herë që bashkia dhe qeveria abuzojnë me të drejtat e tyre elementare.
Ju lutem kushdo që ka njohuri të thelluara për këtë proçes teknik dhe juridik të na ndihmojë. Nuk po luftojmë thjeshtë për gjobat po luftojmë kundër arrogancës dhe babëzisë. Ju falenderoj Arbeni.
