Flamur Golemi, deputet i PS-së në qarkun e Gjirokastrës, pritet të dorëzojë mandatin, pasi do të garojë për kryebashkiak.
Golemi u zyrtarizua si kandidat i PS-së për zgjedhjet e 30 qershorit javën e kaluar, çka do të thotë se ai duhet të dorëzojë mandatin e deputetit.
Po kush pritet t’a zëvendësojë Golemin në Kuvend?
Referuar listës shumëemërore të Partisë Socialiste për Qarkun e Gjirokastrës, emrat që vijojnë janë Laert Duraj, Artemis Malo dhe Matilda Çela.
Nëse do të respektohet kjo listë, atëherë në vend të Golemit në Kuvend hyn Duraj, i cili aktualisht është drejtor i Postës Shqiptare.
Por referuar përplasjeve dhe luftës së klaneve që ndodh në situate të tilla, gara mbetet e hapur, pasi mund të ketë refuzime nga kandidatët e listës për marrjen e mandatit.
Burime nga PS, shprehen se Duraj mund të refuzojë mandatin, duke vijuar të mbajë postin e drejtorit, çka do të thotë se gara mund të zhvillohet mes Artemis Dralos, e cila ishte një prej kandidateve në garën e brendshme në PS për kryebashkiake, dhe Matilda Çelës.
Dralo sot është në funksionin e zv.ministres së Jashtme dhe nëse merr mandatin e deputetit, atëherë duhet të largohet nga posti qeveritar i nivelit të dytë.
Ndërsa kandidatja e 3-të në listën shumëemërore të PS-së, Matilda Çela është drejtoreshë në gjimnazin ‘Abaz Shehu’ në Tepelenë.
Burime nga PS shprehen se të tre kandidatët kanë suportet e tyre nga klane dhe grupime brenda PS-së, çka do të thotë se secili prej tyre mund të marrë mandatin e deputetit, nëse hyn në lojë tërheqja e kandidatëve.
Gjithsesi referuar situatës politike dhe asaj që pritet të ndodhë, duket se zëvendësimi i deputetëve që do të garojnë për kryebashkiakë, më tepër mund të kthehet në një proces qokash, pasi vështirë të mendohet se ndonjë prej tyre mund të dalë nga rreshti.
