Mijëra qytetarë i janë bashkuar thirrjes së opozitës për të protestuar kundër qeverisë dhe për të kërkuar dorëheqjen e Edi Ramës nga posti i kryeministrit.
Por sa do të zgjasë protesta e opozitës?
Ish-deputeti demokrat Ervin Salianji thekson se kohëzgjatjen e protestës do e vendosin qytetarët.
Ndërkohë që policia ka dhënë vetëm dy orë kohë për zgjatjen e protestës, Salianji shprehet se policia është kthyer si seksion i Partisë Socialiste.
“Kohëzgjatjen e protestës do e përcaktojnë qytetarët, janë ato që do të vendosin se sa orë do të zgjasi protesta”, tha Salianji.
I pyetur nëse do të ketë përplasje, Salianji shprehet “këto nuk janë të parashikuara nga ne si organizator, por asgjë nuk përjashtohet duke parë revoltën e njerëzve dhe mos tërheqjen e Kryeministrit që lufton për pushtet personal. Besoj nuk do të përplaset askush për interesat e Ramës”.
Policia ka dhënë leje për zhvillimin e tubimit deri në orën 20:30, por me shumë mundësi vështirë do të jetë që mijëra qytetarë të mbledhur në bulevardin Dëshmorët e Kombit do të respektojnë këtë orar të vendosur.
