Gjykata e Tiranës ka liruar nga qelia ish-deputetin e Partisë Demokratike Klevis Balliu, i akuzuar për prishje të qetësisë publike, kundërshtim të forcave të policisë dhe tubim të paligjshëm.
Prokuroria ka kërkuar arrest shtëpie për Balliun, i cili u arrestua gjatë protestës së para dy ditëve te “Fabrika e Miellit” në kryeqytet, ku kryeministri Edi Rama po zhvillonte një vizitë. Ndërsa për tre të arrestuarit e tjerë, organi i akuzës kërkoi masën e arrestit me burg.
Ndërkohë, gjykata vendosi detyrim paraqitje për Klevis Balliun. E njëjta masë u dha edhe për të ndaluarit e tjerë.
Lidhur me protestën, përveç katër të arrestuarve, u proceduan penalisht edhe 23 të tjerë, ndërsa 3 u shpallën në kërkim. Akuzat që janë ngritur ndaj protestuesve janë: ”Kundërshtim me dhunë të punonjësit të rendit publik”, “Goditje për shkak të detyrës”, “Organizimi dhe pjesëmarrja në grumbullime dhe manifestime të paligjshme”, ”Pengimi i qarkullimit të mjeteve të transportit”, “Prishja e qetësisë publike” dhe “Shkatërrimi i pronës”.
Balliu: Arrestim politik
Ish-deputeti mohoi akuzat në gjykatë dhe e quajti arrestimin e tij politik.
“Dhe policia pasi pranoi dhe më nxorën deri te dera, cuditërisht pas një urdhri të dytë të ardhur përsëri nga larg më rikthyen brenda dhe nuk lanë dokotrët që unë të shkoja te spitali. Dhe kontrolloni kamerat, kur dy oficerë të policisë ka rrezik edhe ky që paska qenë me krahë të thyer, qenka kaq i mirë sa dhe me krahë të thyer më ndihmonte mua të ecja se nk shihja për shkak të gazit, më thoni ju si mund t’i thyej krahun unë një personi kur unë nuk shoh nga sytë. Të jeni të sigurtë se këto janë hapat e para të arrestimeve politike të babait shpirtëror të këtij që kemi sot në qeveri, por pa merak se shumë shpejt do vijë Lulzim Basha e do i heqë qafe një e nga një”, u shpreh Balliu para trupit gjykues./bn/
