Katër persona, mes tyre edhe ish-deputeti i PD-së Klevis Balliu janë arrestuar nga policia e Tiranës lidhur me protestën e një dite më parë te “Fabrika e Miellit”.
Zyrtarisht, Policia e Tiranës njoftoi se 30 personat në hetim janë për aktet e dhunës në ditën e djeshme, megjithatë ajo që u pa ishte dhuna që efektivët e policisë ushtruan nga qytetarëve. “Policia e Tiranës nën drejtimin e Prokurorisë së Rrethit Gjyqësor Tiranë ka arrestuar 4 shtetas, për veprime të dhunshme mbi Policinë dhe shkatërrimin e pronës, ditën e djeshme në zonën e Unazës së Re. Veprimet proceduriale janë kryer në bazë të një analize të pamjeve filmike, raport shërbimeve, si dhe provave të tjera të mbledhura nga grupi hetimor. Janë proceduar në gjendje të lirë dhe 23 persona të tjerë, si dhe 3 janë shpallur në kërkim”, thuhet në njoftimin e Policisë.
Të arrestuarit
– Klevis Balliu 30 vjeç, banues në Tiranë;
– L.M., 42 vjeç, banues në Tiranë;
– S.H., 34 vjeç, banues në Tiranë;
– E.S., 41 vjeç, banues në Tiranë.
Në njoftimin zyrtar, paralajmërohen të tjera ndalime: “Po punohet për identifikimin, kapjen dhe vënien para përgjegjësisë ligjore të personave të tjerë që kanë kryer veprime të dhunshme gjatë protestës së djeshme”.
Akuzat
Akuzat që rëndojnë ndaj qytetarëve janë për veprat penale ”Kundërshtim me dhunë të punonjësit të rendit publik”, “Goditje për shkak të detyrës”, “Organizimi dhe pjesmarrja në grumbullime dhe manifestime të paligjshme”, ”Pengimi i qarkullimit të mjeteve të transportit”, “Prishja e qetësisë publike” dhe “Shkatërrimi i pronës”.
Protesta
Protesta nisi paraditen e djeshme pasi banorët vunë re prezencë të shtuar të policisë në zonën e “Fabrikës së Miellit”, ku kryeministri Edi Rama zhvilloi një takim. Të frikësuar për prezencën e shtuar të policisë e më pas në shenjë revolte ndaj shefit të qeverisë, banorët dolën në protestë duke bllokuar rrugën. Për të shpërndarë protestuesit Policia përdori dhunë fizike, shkopa gome e spraj lotjellës. Dy burra dhe një gra mes protestuesve, humbën ndjenjat si pasojë e dhunës policore. Disa të tjerë përfunduan në spital. Një ditë më parë, u shfaq në media edhe dëshmia e një prej të plagosurve, i cili në gjendje të rëndë nga shtrati i spitalit shpjegonte se si efektivët e policisë, që u shfaqën të armatosur në protestën, e helmuan me gaz lotsjellës.
Prej muajsh, banorët e “Unazës së Re” protestojnë duke kërkuar rrëzimin e projektit për rikonstruktimin e rrugës nga sheshi “Shqiponja” te mbikalimi pranë “pallatit me shigjeta”. Projektin, që parashikon shembjen e banesave të tyre, ata e cilësojnë korruptiv.
/BN/
