Në 9 prill në pistën e aeroportit të Rinasit u grabitën disa miliona euro. Grabitësit përdorën një furgon me mbishkrimin “hetimi tatimor” për të hyrë në pistën e aeroportit dhe për të kaluar më pas në anën tjetër.
Në ndjekje të tyre është vendosur një furgon policie me efektivë të FNSH-së, të cilët më pas sipas variantit zyrtar të shpërndarë nga policia kanë shkëmbyer zjarr me grabitësit.
Në përfundim, njëri prej grabitësve, që u identifikua nga familjarët si Admir Murataj mbeti viktimë.
Por kush e vrau Admir Muratajn?
Nga ekspertiza mjeko-ligjore rezulton se viktima kishte marrë një plumb në kokë, në pjesën e syrit.
Predha ka qenë e kalibrit të madh, ndërsa nuk ka një konkluzion se kush ka qëlluar për vdekje njërin prej autorëve të dyshuar të ngjarjes.
Eksperti i kriminalistikes Mitat Havari përjashton mundësinë që Admiri të jetë vrarë nga policia.
“E para që unë e përjashtoj mundësinë e shkëmbimit të zjarrit, kjo do ndodhte më para, policia ka aq djem që do shponte gomat ti spostonte.
Nga dëshmitë e pjesëtarëve të policisë rezulton që nuk ka pasur një sulm drejt tyre pasi nuk ka asnjë predhë në furgonin e policisë.
Përderisa nuk ka shenja, asnjë polic s’është lënduar, këtë pjesë këtu unë e quaj imagjinare, pastaj vijmë te vendi ngjarjes, është kthyer furgoni, bllokuar, policia nuk sheh gjë, është totalisht e bllokuar. Bie si version, s’ka shenja.
Në qoftë se banditët do vendosnin makinën hetimi tatimor, ishte bllokuar rruga, imagjinojmë se policia ka qenë atje, s’ka pasur sheshpamje, viktima bie aty, gjë që bie poshtë, s’ka qenë policia që e ka vrarë, kanë qenë vetë grabitësit ekzekutorët”, ka deklaruar Mitat Havari në një intervistë televizive për Top Channel.
Lidhur me ngjarjen e rëndë, hetimet vazhdojnë, ndërsa policia ka arrestuar disa persona, si të dyshuar lidhur me grabitjen.
