Durrësi është një nga bashkitë që socialistët duket se do e kenë të vështirë të përcaktojnë një emër për të hyrë në zgjedhjet lokale të 30 qershorit, edhe pse nga ana e opozitës është deklaruar mospjesëmarrja dhe është paralajmëruar se nuk do të ketë proces.
Pas mosrikandidimit të Vangjush Dakos, emri i të cilit rezulton i përfshirë edhe në përgjimet që prokuroria ka, në atë që njihet si “Dosja 339” ku përfshihen material mbi manipulimin dhe tjetërsimin e vullnetit të zgjedhësve, si dhe pas tërheqjes së Spartak Kovaçit, një prej bashkëpunëtorëve të afërt të kryebashkiakut aktual, në garën mes socialistëve janë 4 kandidatura, dy deputete, një.zv.ministre dhe një anëtare e këshillit bashkiak.
Milva Ekonomi dhe Klodiana Spahiu, të dy deputete të PS-së janë gati të heqin dorë nga mandate i ligjvënësit për të garuar për bashkinë e qytetit bregdetar, një nga bashkitë kryesore në vend.
Gjithashtu Rovena Voda, zv.ministre e Brendshme përfshihet në listën e kandidateve, ndërsa emri surprizë, që ka dalë në ditët e fundit është Ana Dhamo, ish-kandidate për deputete e PS-së dhe sot anëtare e Këshillit Bashkiak të Durrësit.
Voda, është një nga emrat që garon për këshillin bashkiak të Tiranës, çka do të thotë se me shumë pak gjasa ajo mund të garojë për kryebashkiake të Durrësit. Ose ajo duhet të tërhiqet nga lista e këshilltarëve socialistë për Tiranën dhe të garojë për Durrësin. Por fakti që listat e PS-së për Tiranën janë publikuar pak javë më parë tregon se “dera” e zv.ministres për të garuar si kryebashkiake nuk ka qenë e hapur.
Në anën tjetër Ekonomi ka mohuar që të jetë në garën për kryebashkiake, duke u shprehur se ajo është deputete e Qarkut të Durrësit dhe do të vijojë në këtë pozicion.
Në këto kushte duket se kandidaturat që rivalizojnë njëra-tjetrën për garën brenda PS janë deputetja Klodiana Spahiu dhe këshilltarja e PS-së, Ana Dhamo.
Kjo e fundit duket se ka mbështetjen edhe të deputetit Lefter Koka, i cili nuk dorëzoi mandatin e deputetit.
Madje fundjavën e kaluar, është raportuar një takim mes kryeministrit Rama dhe deputetit Koka, i cili ka shprehur mbështetjen për këshilltaren bashkiake të PS-së në garën për kryebashkiake.
Ajo që bie në sy është fakti se në të gjithë këtë lojë kandidaturash, kryebashkiaku aktual Vangjush Dako, sikundër raportohet ka mbajtur një pozicion të tërhequr, prej momentit që Spartak Kovaçi u tërhoq nga kandidimi.
Nuk dihet pse Rama po tenton të krijojë një support përtej rradhëve të PS-së kur të paktën deri më tani ai është deklaruar për zhvillimin e zgjedhjeve më 30 qershor dhe përballë kandidatëve të partisë që drejton nuk do të ketë opozitën, e cila nuk është regjistruar në zgjedhje. /Boldnews.al
