Lulzim Basha, kryetar i PD-së, deklaroi sot se opozita nuk do të njoh asnjë vendim të marrë në Komisionin për Reformën Zgjedhore, që drejtohet nga Damian Gjiknuri dhe Rudina Hajdari.
Basha theksoi se ky nuk është komisioni për reformën zgjedhore, por komisioni i paraburbimit të Damian Gjiknurit, dhe çdo deputeti që ka kryer krimin elektoral.
“Kam një mesazh ndaj atyre që janë ulur në krah të Damian Gjiknurit, që duhej të ishte në burg, dhe sot drejton reformën zgjedhore, krah për krah atyre që kanë ushtruar presion ndaj shqiptarëve, ai nuk është komisioni i reformës zgjedhore, ai është komisioni i paraburgimit të Gjiknurit dhe gjithë atyre që bënë krimin zgjedhor. Nuk e njohim, nuk do ta njohim, mos harxhoni kohën kot”, tha Basha.
Sipas tij, procesi i ndryshimeve të thella kushtetuese, duhet dhe do të bëhet me konsultimin më të hapur publik, do të bëhet përmes referendumit popullor.
“Parlament me 100 deputetë të zgjedhur drejtpërdrejtë, apo me lista të hapura, Senat për ti vënë fre miratimit të ligjeve sikur ka ndodhur deri tani, duke i shërbyer oligarkëve, President, pse jo të zgjedhur nga populli, dhe referendume lokale dhe kombëtare, për t’i dhënë të drejtën qytetarëve të vendosin për fatet e tyre”, tha Basha.
