Ministrja e Shtetit, Elisa Spiropali, tha sot se fjalimi i kryeministrit Edi Rama me fjalët burg, burg, burg ishte mëse i domosdoshëm.
Spiropali tha se është e papranueshme që kryeministri të goditet me vezë apo me bojë nga të marrët që janë deputetë.
Drejtuesja e emisionit Sonila Meço tha se kjo është e papranueshme që kryeministri të kërcënojë me burg cilindo që proteston për të drejtat e tij, apo kur kemi një shtet që shkel të drejtat bazike të qytetarëve.
Por Spiropali ka këmbëngulur që është e papranueshme që kryeministri apo presidenti të cënohen kur janë në punët e tyre.
“Merreni me mend se çfarë mund të ndodhë me një fermer kur goditet kryeministri?”, tha Spiropali.
Ndërkohë lidhur me shkuljen e shkronjave nga fasada e Teatrit, ministrja e Ramës tha se nuk ka asnjë ndjesi për këtë, pasi nuk e dinte as si janë hequr as kush i ka hequr.
“Mazhoranca ka votuar një ligj mbi Teatrin dhe është në të drejtën e saj. Mendoj se vendimet i marrim ngadalë, duhet t’i marrim më shpejt”, tha Spiropali, ndërsa gazetarja Meço i tha se mungon transparenca në miratimin e ligjeve, veçanërisht atyre që favorizojnë një kompani apo një biznes të caktuar.
“Ne s’kemi ndërmend të vrasim njeri, ne s’kemi ndërmend që të plagosim njerëz”, tha Spiropali, ndërsa gazetarja i përmendi arrestimet dhe mbushjen plot të burgjeve me qytetarë për çështjet e faturave të energjisë elektrike, ndërkohë që për të gjithë aferat e qeverisë nuk është future asnjë njeri në burg.
