Barush apo Bajram Bregu, 33 vjeç, u arrestua dje pas një operacioni të ndërmarrë nga RENEA, FNSH dhe repartet Shqiponja, në zonën e Komunës së Parisit, në Tiranë.
Shkodrani 33 vjecar fshihej në një banesë të marrë me qira në këtë zonë, ndërsa sikundër raportohet, policia kishte disa ditë që e mbante në survejim, deri në momentin e ndërmarrjes së operacionit.
Dyshimet janë se 33-vjeçari është bashkëpunëtori më i ngushtë i Ibrahim Liçit, i dyshuari kryesor për vrasjen e vëllezërve Bilali me 30 mars të këtij viti.
Barush apo bajram Bregu ka qenë i skeduar nga policia, ndërsa në vitin 2016 është dënuar me 4 vite burg për kultivim të bimëve narkotike, kryer në bashkëpunim si dhe armëmbajtje pa leje. Në vitin 2018, policia gjatë një operacioni në banesë i gjeti një automatik kallashnikov, ndërsa ai arriti t’i shpëtonte arrestimit.
I shpallur në kërkim prej pothuajse 1 viti, Bregu kishte arritur t’i shpëtonte policisë, deri mesditën e djeshme, kur u kap në banesën pranë Komunës së Parisit.
Në operacionin policor, u përfshinë rreth 100 efektivë, midis tyre edhe pjesëtarë të RENEA dhe FNSH, për shkak se nga policia lokale e Shkodrës ai trajtohet si person me rrezikshmëri të lartë.
Dyshimet janë se Bregu ka ndihmuar mikun e tij Ibrahimin në vrasjen e dyfishtë të vëllezërve Bilali, por edhe në ngjarje të tjera kriminale.
Barush Bregu dyshohet edhe si personi që ka ndihmuar Ibrahim Liçin në çdo lëvizje të këtij të fundit. Bashkë me 33 vjeçarin u kap edhe Bajram Çekorja, 21 vjeç banues në Shkodër i dyshuar për përkrahje të Barush Bregut, shkruan Balkanweb.
Nga ana tjetër me 27 prill të këtij viti policia e Shkodrës pas informacionit për të shtëna në fshatin Luarës të Velipojës zhvilloi një aksion atje duke menduar fillimisht për ndonjë bazë droge.
Policia nuk arriti që të identifikojë se kush ka qëlluar nga mjeti tip Golf pasi personat janë larguar me shpejtësi pa lënë gjurmë. Pas kontrolleve në çdo shtëpi për të kapur autorët, rastësisht policia gjeti në banesën e braktisur të shtetasit Gëzim Sela i cili jeton prej disa vitesh jashtë Shqipërisë një arsenal armësh dhe municionesh. Gëzim Sela është vjehrri i vëllait të Ibrahim Liçit dhe banesa e tij ka të paktën 5 vite e braktisur.
Pas kësaj bingoje rastësore të efektivëve u ngritën dyshime se Ibrahim Liçi mund ta ketë përdorur atë banesë të braktisur si bazë për të lënë armët dhe municionet si dhe për t’ju fshehur policisë. Në atë banesë policia gjeti një arsenal armësh si një armë ushtarake të rëndë granat hedhës (blind shpues), silenciator, radio policie, 700 fishekë luftarakë, krëhëra me fishekë kallashnikovi, dy telefona dhe një targë motorçiklete.
Armët dhe municionet e gjetura në Velipojë policia dyshon se mund të jenë përdorur në ngjarje kriminale dhe aty përveç sekuestrimit janë marrë edhe gjurmët e gjetura ndërsa vijojnë hetimet.
