Kryetarja e Lëvizjes Socialiste për Integrim, Monika Kryemadhi, ka bërë homazhe për ditën e dëshmorëve.
Me anë të një postimi në rrjetet sociale, Kryemadhi ka shkruar se në një ditë si kjo të gjithë duhet të mbajnë frymën, për respekt të atyre që kanë rënë për të mbrojtur atdheun.
Më tej Kryemadhi shkruan se nderimet ndaj dëshmorëve, janë nderime për historinë dhe popullin tonë.
Postimi i plotë i Monika Kryemadhit
Në 5 maj i gjithë Atdheu mban frymën në respekt të pafund për të rënët për atdheun, martirët e kombit që sakrifikuan jetën e tyre e në emër të Shqipërisë.
Lufta për çlirimin e atdheut gjaku i derdhur, jetët e flijuara dhe sakrificat sublime për lirinë e tij, janë gdhendur si dëshmia monumentale e një populli që ka luftuar në mënyrë të paepur me pushtuesit gjatë gjithë historisë së tij.
Nderimi ndaj dëshmorëve, është nderim për historinë e popullit, por është edhe një referencë krenarie, që na frymëzon për ta mbajtur të shenjtë amanetin e tyre, Shqipërinë e lirë, shtëpinë tonë të përbashkët!
Lavdi e përjetshme dëshmorëve të atdheut!
