Policia ka hequr tabelat dy gjuhëshe, greqisht-shqip, të vendosura në Finiq.
Aksioni për heqjen e tabelave është ndërmarrë në orët e natës. Sikundër raportohet policia ka hequr tabelat që ngjallën reagime të shumta.
PDIU përmes një deklarate e cilësoi vendosjen e tabelave të tilla si Rilindje e pretendimeve vorioepirote nën hundën e qeverisë Rama.
“Nëse qeveria shqiptare nuk ndërhyn në kohë, tregon se ka gisht në cënimin e sovranitetit të vendit. Çdokush të jetë i qartë se shqiptarët nuk do të rrinë duarkryq përballë këtij skandali dhe për pak ditë, kjo shëmti do t’i përkasë historisë!”, thuhej në reagimin e PDIU-së.
Ndërkohë, ish-deputeti i LSI-së në Qarkun e Vlorës, Shezai Rrokaj, e konsideroi një turp kombëtar vendosjen e tabelave ku gjuha shqipe është në plan të dytë.
“Shikoni këto tabela rrugore? Lart greqisht, poshtë shqip. Duhet të ishte e kundërta. Sepse gjuha shqipe është gjuha zyrtare në Kushtetutën tonë. Gjuhët e pakicave gëzojnë të drejta të përdorimit lokal, por jo të jenë parësore karshi gjuhës zyrtare. Kjo është e qartë edhe në Konventën Kuadër të KE-së për Mbrojtjen e Pakicave Kombëtare, ratifikuar me ligjin nr 8496, dt 3.6.1999.
Mbrojtja e të drejtave të pakicave, në rastin konkret ajo greke, nuk mund të bëhet në dëm të prestigjit të gjuhës së shumicës që është gjuhë zyrtare. Ligji për Pakicat Kombëtare, që u miratua në Kuvend para gati një viti kishte shumë probleme të kësaj natyre, të cilat i kam ngritur gjatë diskutimit të tij. Pata theksuar, ndër të tjera, lidhur me përgjegjësitë që do kishte Këshilli i Ministrave dhe institucionet e tjera për zbatimin korrekt të tij. Ky është një rast i paprecedentë, kur ligji po ndëshkon prestigjin e gjuhës së shumicës, kurse sa për tabelat rrugore edhe në gjuhën shqipe në Prevezë, Igumenicë, Filat etj., kjo e drejtë s’është e drejtë”, shkruan Rrokaj.
