Monika Kryemadhi, kryetare e LSI-së, ka bërë një deklaratë të fortë gjatë Konventës Kombëtare të forcës politike që drejton, lidhur me atë që sot vendi ka mbetur pa gjykata, dhe shqiptarët nuk kanë ku të ankohen ndaj vendimeve arbitrare dhe grabitqare të qeverisë.
Kryemadhi më konkretisht u ndal në ligjin e ri që parashikon “tjetërsimin” e pronave.
“Unë sot jam e bindur, që në bazë të një plani mafioz, të mirëmenduar mirë dhe në emër të së ashtuquajturës Reformë në Drejtësi, me qëllim dhe me paramendim kemi mbetur pa gjykata, pa Gjykatë të Lartë, dhe pa gjykatë Kushtetuese. Që ligji për Katasdrat dhe për tjetërsimin e pronave mos të ketë ku të paditet, por banda dhe krimi i organizuar bashkë me oligarkët të grabisin pronat e shqiptarëve dhe shtëpitë e tyre.
Nëse kryeministri i një vendi kalon në Kuvend një ligj të posaçëm për tjetërsimin e titujve të pronësisë dhe nuk ke gjykatë ku të ankohesh dhe as arbitër, është më mirë që të digjen mandatet e opozitës, se sa të vidhen dhe të grabitet prona e shqiptarëve dhe shtëpitë e shqiptarëve”, tha Kryemadhi.
