Ditmir Bushati, ish-ministri i Jashtëm, i larguar nga kryeministri Edi Rama, në kulmin e debatit mbi ndryshimin e kufijve Kosovë-Serbi, ka shfaqur sërisht ndasitë me kreun e ekzekutivit shqiptar lidhur me këtë çështje.
Para një grupimi studentësh, Bushati tha se bënte pjesë tek ajo kategori që nuk e sheh zhvillimin e Shqipërisë dhe apo të Kosovës, të shqiptarëve në përgjithësi në rajon, në kurriz të një populli apo kombi tjetër.
“Për politikën shqiptarë, pavarësisht kush ka qeverisur ka qenë një konstante, respektimi i integritetit territorial të Maqedonisë së dikurshme apo Maqedonisë së Veriut sot.
Kështu që nuk besoj se do ketë politikan në Shqipëri që të mos respektojë integritetin territorial të Kosovës.
Nuk mendoj se do ketë njeri kurajon në Shqipëri të aplikojë një standard të ndryshëm nga ai që politika shqiptare ka aplikuar 30 vjet për fqinjin tjetër që është sot Maqedonia e Veriut”, tha Bushati.
