Në mbledhjen e grupit parlamentar socialist, Kryeministri Edi Rama, ka prezantuar ndryshimet në Kodin Penal, ku parashikohen dënime me burg për ata që abuzojnë me shëndetin, rastet e dhunës për shkak të detyrës, ata që shkelin në fushat e futbollit, apo ata që vjedhin të drejtën e autorit.
Gjithashtu, Rama paralajmëroi burg edhe për ata që bllkojnë rrugët, duke shtuar se situate të tilla duhet të marrin fund.
Rama është shprehur se do të ketë ndëshkime shembullore për të gjithë ata që do të guxojnë të konsumojnë njërën prej këtyre veprave.
“Produktet tona bujqësore janë të shëndetshme dhe për këtë mjafton një fakt në 300 mijë tonë produkte bujqësore të eksportuar në BE, asnjë kamion i vetëm është kthyer për shkak të cënimit të standardeve evropiane të sigurisë ushqimore, por ka fatkeqësisht individë edhe subjekte që kryejnë krime kundër shëndetit të njeriut, ia kanë hedhur 30 vjet me gjoba që nuk janë asgjë krahasuar me fitimin e tyre.
Kjo nuk mund të vazhdojë kështu, këtyre forcave të së keqes në shoqërinë tonë që guxojnë të kërcënojnë shëndetin e fëmijëve tanë dhe këtyre që në këtë vend jetojnë dhe konsumojnë ushqim do t’u rezervojmë ndëshkimin e heqjes së lirisë së aktivitetit dhe të lirisë individuale gjithashtu.
Masa e dënimit do të jetë burg deri në 10 vjet. E njëjta gjë për prodhimet ushqimore jashtë afatit të përdorimit”, tha Rama.
Sipas tij, mashtrimi me produktet ushqimore hyn në veprat penale, zëvendësimi i shenjave të sigurisë, që është një tjetër lojë e zhvilluar hyn në veprat penale.
Një tjetër ndryshim i propozuar është dënimi me burg për dhunuesit e personave që janë në krye të detyrës.
Kjo masë është propozuar veccanërisht pas dhunës së ushtruar ndaj bluzave të bardha.
“Domosdoshmëria për një përgjigje të prerë ligjore mbi dhunën ndaj të zgjedhurve dhe funksionarëve, që nga salla e parlamentit deri në çdo metër katrorë të Shqipërisë, dhunën ndaj punonjësve të policisë që nga kundërshtimi me forcë deri tek prekja me gishtin e vogël të uniformës blu”, tha Rama.
