Sekretari i Përgjithshëm i PD-së, Gazmend Bardhi, u shpreh pasditen e sotme se qytetarët që poi bashkohen çdo ditë kësaj partie është një mesazh që i jepet të gjithëve se ne s’kemi frikë nga Edi Rama.
Sipas Bardhit, qytetarët po tregojnë se janë të gatshëm të mbështesin PD-në deri në fund për rrëzimin e Edi Ramës.
“Rruga e zgjedhur nga ne është e vetmja rrugë për t’a kthyer vendin në një situatë normale, për ta bërë Shqipërinë një vend me një qeveri normale që i shërben qytetarëve.
Në këto 3 muaj ne i kemi dalë zot vendit dhe jemi të vendosur të çojmë betejën deri në fund.
Sa kohë që Edi Rama do të jetë në postin e kryeministrit, ne nuk do të angazhohemi as në bisedime, as në dialog dhe as në zgjedhje”, tha Bardhi.
Sipas tij, nuk ka asnjë tërheqje, asnjë kthim pas.
“Rruga e vetme është rrëzimi i Edi Ramës. Ne nuk mund të negociojmë dhe bisedojmë me njeriun që e ka çuar vendin në këtë situatë.
Ne nuk dimë sesa qershorë dhe shtatorë të tjerë do të kalojnë për të kaluar në fazën tjetër të integrimit, por ajo që dimë është sesa kohë vendi të ketë në krye të qeverisë Edi Ramën, sa kohë vendi të ketë këto kushte ekonomike, sa kohë që lidhjet e krimit me politikën të mos këputen, dyert e BE-së do të jenë të mbyllura për Shqipërinë”, tha Bardhi.
Sipas tij, pa u garantuar zgjedhjet e lira dhe të ndershme, nuk mund të kemi as një qeveri normale, që t’i zgjidhë hallet dhe problemet qytetarëve.
“Beteja për zgjedhjet e lira dhe të ndershme është beteja kryesore nga e cila vjen zgjidhja e të gjitha problemeve të tjera, që nga qeveria deri te zgjidhja e problemeve të qytetarëve”, tha Bardhi.
