Partia Socialiste ka mbledhur Kryesinë për të diskutuar mbi kandidatët e kësaj force politike në 61 bashkitë e vendit, si dhe për sondazhet që janë organizuar nga socialistët lidhur me emrat, në rastet kur ka pasur më shumë se një emër për kandidat.
Por mbledhja e Kryesisë së PS-së duket se është një formalitet, kur deri më tani, pothuajse janë përcaktuar të gjithë kandidaturat për kryebashkiak, të paktën në njësitë e mëdha vendore.
Kështu përjashtuar Gjirokastrës, Durrësit, Shkodrës, Vorës dhe Kamzës, në pothuajse të gjitha bashkitë e tjera të mëdha, janë përcaktuar kandidaturat, që kanë marrë edhe bekimin e Edi Ramës.
Ndërkohë që mësohet se anëtarët e kryesisë së PS janë njohur me sondazhet për bashkitë ku ka më shumë se 1 kandidaturë dhe më konkretisht për Durrësin dhe Shkodrën.
Burimet bëjnë të ditur se në Shkodër, kandidatura e preferuar është ish-zv.Kryeministrja, Senida Mesi, e cila gjatë kohës që mbante funksionin qeveritar është përplasur jo pak herë me drejtuesin politik të qarkut, Ditmir Bushatin, ish-ministër i Jashtëm.
Ndërkohë për qarkun e Durrësit, kandidatura e preferuar është Adrian Çela, aktualisht drejtor i OSHEE dhe që ka qenë bashkëpunëtori i ngushtë i Vangjush Dakos, duke mbajtur më parë pozicionin e nënkryetarit të Bashkisë së qytetit bregdetar.
Për Gjirokastrën në garë për kandidim janë deputeti Flamur Golemi, Armand Hilaj kryetar qarku, Ornela Çuçi zëvendës ministre e Mjedisit dhe homologia e saj nga ministria e punëve të jashtme Artemisa Dralo. Mësohet se Golemi dhe Dralo janë më të kuotuarit në rradhët e PS-së.
Deri më tani janë rikonfirmuar për një tjetër mandat Erion Veliaj në Tiranë, Armando Subashi në Fier, Dritan Leli në Vlorë, Sotiraq Filo në Korçë.
Ndërkohë që është vendosur që për Bashkinë e Kukësit të kandidojë Safet Gjici, në Lezhë Pjerin Ndreu, në Pogradec Ilir Xhankolli, në Shijak Ilir Ndraxhi, ndërsa në Vorë, Sadi Vorpsi, ish-prefekt i Tiranës, është më i favorizuari.
Për Kavajën në garë nga rradhët e socialistëve është propozuar mjeku Arben Rrugia, por ky i fundit nuk e ka konfirmuar, ndërsa në Tropojë pritet të kandidohet Rexh Biberaj
