Grabitja e 9 prillit në pistën e aeroportit Nënë Tereza i ka dhënë akses policisë që të ketë një punonjës të sajin në sallën e kamerave të sigurisë, të cilat mbikqyren nga koncensionari.
Kjo është konsideruar nga policia si pjesë e planit emergjent për sigurinë në aeroportin ndërkombëtar të vendit, ndonëse në grabitjen e fundit, referuar dokumenteve të sekuestruar nga policia, alarmi nga koncensionari është dhënë në kohë reale lidhur me grabitjen.
Burime nga policia e shtetit thanë se në ndryshim nga procedurat e mëparshme kur policia kërkonte nga koncesionari pamje të caktuara të kamerave të sigurisë, tashmë një oficer është vendosur gjatë gjithë kohës në sallën e monitorimit, raporton Ora News.
Efektivi i komisariatit të Rinasit ndjek në kohë reale situatën në aeroport dhe për çdo anomali njofton menjëherë eprorët e tij duke shmangur kështu vonesat në komunikim.
Ministri i Brendshëm ka akuzuar që vjedhja e datës 9 prill është njoftuar 5 minuta e 20 sekonda me vonesë nga koncesionari. Ndërkohë që ky i fundit pretendon të kundërtën.
Ndërkohë një tjetër masë është ajo që në komisariatin e policisë së Rinasit do të shtohet numri i efektivëve.
Kur po bëhen gati dy javë nga grabitja, ende nuk ka asnjë person të identifikuar, por vetëm persona të dyshuar, të përfshirë në grabitje të tjera të ngjashme me atë të 9 prillit. Për të mbërritur tek grabitësit, hetuesit kanë analizuar disa grupe kriminale që kanë qenë aktive në vepra të ngjashme penale që nga viti 2016.
Me gjithë dyshimet e forta, hetuesit duhet të mbledhin prova për personat e përfshirë në grabitje, ndërsa është marrë në konsideratë dhe faktin se ngjarja ka ndodhur 15 ditë pas sekuestrimit të pasurive të Admir Muratajt dhe familjarëve të tij.
Lidhur me këtë grabitje ministri i brendshëm, Sandër Lleshaj deklaroi në parlament se autorët do të vihen përpara drejtësisë, por të premten policia kërkoi ndihmën e qytetarëve për ti identifikuar. Siguria e aeroportit ishte cënuar disa herë radhazi nga viti 2016 e në vazhdim por koncesionari nuk kishte marrë masat shtesë të kërkuara nga policia dhe aviacioni civil.
