Naingolan-Zaniolo, Roma-Inter një duel për… hakmarrje

Kanë kaluar disa muaj nga sfida e fundit midis Interit dhe Romës. E fundit ishte më 2 dhjetor në “Olimpico”, ku palët u ndalën në një barazim spektakolar(2-2). Por, ajo që do të luhet të shtunën në mbrëmje do t’i ngjajë shumë pak ndeshjes së dhjetorit. Teksa kampionati po i afrohet fundit, skuadrat do të ndeshen për një vend në Champions. Inter-Roma nuk do të jetë vetëm një sfidë midis skuadrave, por edhe midis lojtarëve.

Një sfidë brenda sfidës do të jetë edhe ajo midis Raxha Naingolan dhe Nikolo Zaniolo, protagonistët e një transferimi të çuditshëm në merkaton e verës të kryer midis dy klubeve. Një shkëmbim, i cili në fillim u aprovua nga tifozët, por që më pas nuk shkoi ashtu siç u parashikua. Spaleti kërkoi me ngulm Naingolanin dhe e detyroi atë të linte Romën për talentin më premtues të akademisë zikaltër.

Ninxha e sheh veten më lart në aspektin e skuadrës që renditet më sipër se ata verdhekuq. Ndërkohë që Zaniolo gjeti vazhdimësinë e tij në fushë dhe kombëtaren e Italisë. Tifozët zikaltër e kanë cilësuar së fundmi si një nga talentet më premtues që ka lënë skuadrën e Interit, teksa romanistët kanë hequr dorë nga një lojtar karizmatik dhe problematik siç ishte mesfushori belg. Bajerni i Mynihut në Gjermani dhe Juventusi kanë shfaqur interes për talentin italian dhe në verë do të nisin ofertat e tyre drejt klubit roman që zotëron kartonin e tij.

LEXO EDHE  Vdekja e legjendës së Tiranës, reagon Basha: S’do pushojë kurrë së ndriçuari, do të vijojnë të frymëzojnë të rinj

Për 90 minuta do të kemi në fushë dy lojtarë me histori të ndryshme, shumë ndryshe nga 2 dhjetori i kaluar, ku Naingolan nuk luante për shkak të një dëmtimi dhe Zaniolo që bëri një prezantim mbresëlënës në Serinë A. Sot “Ninxha” është në momentet e tij më të mira tek Interi pas një faze të mbushur me dëmtime dhe qëndrime të shumta jashtë fushe. Teksa Zaniolo duhet të bindë trajnerin e ri, Klaudio Ranineri, që nuk është i pazëvendësueshëm.

Kush do të jetë fitues në fund? Naingolan kërkon të shlyejë borxhin te tifozët dhe trajneri, të cilët kanë pritur gjatë për të parë “Ninxhën” e vjetër në fushën e lojës. Zaniolo do të kërkojë të provojë se Interi bëri gabim që e la të largohej për mesfushorin belg. “San Siro” do të jetë një gjykatës i rreptë të shtunën në mbrëmje.