E hëngrët tepsinë dhe as bakrin s’keni lënë…/ Deputeti nxin Ramën dhe lë me gisht në gojë “opozitën e re”

Deputetët që kanë pranuar mandatet duke plotësuar vakancën e krijuar në Kuvend pas dorëzimit të mandateve nga opozita kanë formësuar sot grupet parlamentare.

Lefter Maliqi, i cili ka marrë mandatin e deputetit, nuk është rreshtuar me asnjë nga grupet parlamentare të asaj që konsiderohet nga Edi Rama si “opozita e re”, por as është afruar me grupin parlamentar të PS-së.

“Nuk besoj as tek opozita e re parlamentare e as tek maxhoranca. Për këtë arsye do e vendos votën time në shërbim të votuesve të të gjitha ngjyrave politike, pa asnjë dallim”, ka sqaruar Maliqi.

Deputeti i qarkut të Beratit nuk ka kursyer akuzat në drejtim të qeverisë, duke mbajtur një qëndrim që mund të konsiderohet surprizues, kjo për faktin se besohej që ligjvënësit që pranuan mandatet e deputetëve, do të ishin thjesht një fasadë e qeverisë.

Maliqi nuk ka kursyer akuzat, madje nga qëndrimet e deritanishme publike, duket se nuk ka lidhje me atë të deputetëve që konsiderohen si “opozita e re”, që duket se po i shkundin pluhurin Ramës nga supet.

“Ka një lloj deliri nga mazhoranca socialiste, por edhe një lloj qetësie kur flasim për rendin, ekonominë, etj.

Por kjo qetësi ekziston vetëm në sallën e Kuvendit, ky zhvillim apo mirëqënie ekziston vetëm në Kuvend, pasi qytetarët jetojnë ndryshe, nga jugu në veri, përsa i takon rendit, sigurisë, ekonomisë, varfërisë, papunësisë.

LEXO EDHE  Rrugët me pagesë, por shqiptarët paguajnë naftën më të shtrenjtë në Europë...

Në rastin e grabitjes së Rinasit u cënua siguria kombëtare dhe kur dëgjova Lleshin më vinte për të qeshur e për të qarë, se ngjarja trajtohet sikur është shtypur ndonjë lepur.

Po askush nuk thotë se ku shkuan 10 mln euro, për çfarë do përdoren ato për kanabis a për terrorizëm? A ka fakte që personin e vrau policia? Kjo ishte një grabitje e bashkërenduar se nuk ka si shpjegohet tjetër. Çfarë bën policia fle gjumë?

Burgjet janë mbushur plot, ka dy vjet që nuk bëhet amnisti se ka njerëz që janë në burg për akuza qesharake. Kriminelët janë jashtë, madje edhe ata që janë të dënuar për shkak të politikës apo drejtësisë së korruptuar, janë dënuar me nga dy vjet.

Jam për një sistem mazhoritar të pastër me 100 zona dhe pastaj të shikojmë këto oligarkët dhe të fortët.

Çfarë po ndodh sot, u kap skandali i 20 mln eurove të unazës së re dhe nuk hetohet ministri që dha tenderin. Pse nuk u hetua? U bë tenderi prapë, fitoi një firmë me 4 mln euro më pak.

Kjo firmë ka investuar në fushatën elektorale në Vlorë, ka bërë edhe rrugën e Surrelit, por si kjo firmë ka edhe shumë të tjera.

E morët tepsinë, e hëngrët tepsinë dhe as bakrin nuk latë për popullin”, tha Maliqi.