Kuvend, Rama akuza opozitës për integrimin/ Ja peshqit e mëdhenj që larguam dhe do ndëshkojmë

Kryeministri Edi Rama ka drejtuar gishtin e përgjegjësisë mbi opozitën lidhur me procesin e integrimit, pasi sipas tij Shqipëria i ka plotësuar të gjitha detyra për të nisjen e dialogut me BE-në.

Sipas tij, opozita me qëndrimet e saj po i jep ushqim vendeve që janë kundër çeljes së negociatave të Shqipërisë.

“Shqipëria i ka plotësuar të gjitha detyrat për të çelur negociatat për në BE. Është shumë e rëndësishme për të gjithë që të kuptohet se çelja e negociatave është një vendim që merret nga Këshilli Europian, bazuar në rekomandimin e komisionit, por edhe si rezultat i dinamikave të brendshme në vendet anëtare.

Nëse raporti ndërtohet mbi kritere ekskluzivisht teknike, duke konfirmuar detyrat për çeljen e negociatave, vendimmarrja ne KE është rezultat i debatit të brendshëm, e ku subjektiviteti politik i vendeve ka rolin e vet, te ky subjektivitet duhet të jemi shumë të qartë që ndikimi ynë është relativ dhe në kushtet kur në Shqipëri ka forca që janë qartësisht të rreshtuara në funksion të integrimit dhe çeljes së negociatave, dhe kam parasysh të gjithë ata që janë të pranishëm në këtë Kuvend që përfaqësojnë atë pjesë dërrmuese të opinionit publik dhe shkojnë në vazhdën e një tradite.

Nga brenda vendit, u jepet forcave kundër zgjerimit e nuk e mirëpresin çeljen e negociatave një ushqim kundër interesave të këtij vendi, kjo është shumë e thjeshtë dhe lehtësisht e kuptueshme nga kushdo, nuk ka asnjë justifikim për eksportimin  dhe nxitjen e konflikteve të brendshme në funksion të kësaj vendimmarrje dhe krijimit të aleancave me forca që janë kundër zgjerimit.

LEXO EDHE  Viti i ri shkollor, cilat rrugë mund të bllokohen nesër në Tiranë

Nga pikëpamja e unitetit politik jemi sot më pas se ç’kemi qenë për vite e vite të tëra në të shkuarën, ku pavarësisht sherreve që e kanë shoqëruar zhvillimin demokratik të vendit, forcat politike kanë qenë gjithmonë në funksion të këtij objektivi të palëvizshëm”, theksoi Rama.

Nga foltorja e Kuvendit, kryeministri ngriti pyetjen se çfarë peshqish janë ato që janë përjashtuar nga sistemi i drejtësisë, janë të vegjël?

“Çfarë lloj peshe kanë patur ata mbi shpatulla të këtij vendi?”, ka shtuar pyetjet Rama.

“KPK, në vitin 2018, ka kaluar në sitë 92 gjyqtarë dhe prokurorë si dhe ka dhënë 35 vendime për shkarkime. Tani që flasim, në muajin janë mbi 60 prokurorë dhe gjyqtarë të përjashtuar nga sistemi, që do të thotë një peshë e madhe është hequr nga shpatullat e këtij vendi”, tha Rama.

Në vijim ai paralajmëroi të përjashtuarit nga drejtësia se Reforma në Drejtësi nuk do të ndalet me shkarkimet.

“Përjashtimi nga drejtësia i atyrë që janë të papërshtatshëm është vetëm njëra pjesë e asaj që do të vijojë me ndërtimin e institucioneve të reja të drejtësisë.

Ata që u shkarkuan do të kthehen sërish, por për tu ndëshkuar. Gjithë ato pasuri nuk do të mund të mbeten pa u hetuar nga sistemi që po ndërtohet me të gjitha atributet për ti shkuar deri në fund kësaj historie”, tha Rama.