Zv. Ndihmës Sekretari i Shtetit për Evropën, Matthew Palmer, do të zhvillojë një vizitë në Tiranë, në kuadër të një turi ballkanik. Qëndrimi i palmer në Tiranë do të zgjasë disa orë, ndërsa zyrtari i lartë i Departamentit të Shtetit do të takohet me Kryeministrin Edi Rama dhe kreun e PD-së, Lulzim Basha.
Burime diplomatike bëjnë të ditur se në agjendën e diplomatit të lartë amerikan nuk parashikohen takime me zyrtarë të tjerë apo politikanë, ndonëse më parë ishte lajmëruar edhe një takim me Presidentin Meta.
Takimin me kryeministrin Rama, palmer do e zhvillojë të hënën, ndërsa një ditë më pas, të martën do të takohet me kreun demokrat Lulzim Basha.
Takimin e fundit, nëse mund të quhet i tillë, palmer do e ketë me përfaqësues të mediave.
Vizita e Palmer në Tiranë vjen në një kohë kur politika shqiptare është përfshirë nga një krizë, e cila është thelluar pas dorëzimit të mandateve nga opozita.
Nuk dihet nëse zyrtari i lartë i DASH do të ketë një plan për zgjidhjen e krizës, apo do të dëgjojë versionet e dy politikanëve më të lartë, njëri në krye të mazhorancës dhe tjetri në krye të opozitës.
Zyrtari i lartë i Departamentit të Shtetit, më 20 shkurt ka biseduar në telefon me kreun e PD-së, Lulzim Basha, si dhe me kryetaren e LSI-së, Monika Kryemadhi.
Pak ditë më pas, deputetët e opozitës dorëzuan në bllok mandatet e deputetëve, duke krijuar për herë të parë një krizë institucionale në Kuvendin e Shqipërisë.
Nuk dihet nëse diplomati i lartë amerikan do të investohet për zgjidhjen e krizës politike, ashtu sikundër veproi dy vjet më parë Brian Hoyt Yee, paraardhësi i Palmer në këtë detyrë.
Por ajo që mund të thuhet është se kriza aktuale politike është më e thellë se ajo e 2017, pasi qoftë Basha ashtu edhe Rama akuzojnë njëri-tjetrin për shkelje të marrëveshjes.
Basha akuzon Ramën se nuk garantoi zgjedhje të lira dhe të ndershme, por përkundrazi përdori grupet kriminale për blerjen e votave, ndërsa Rama akuzon Bashën se nuk mbajti premtimin për të mos kritikuar në gjuhë të huaj vendin. /BN/
