Kryeministri Edi Rama, i cili mban zyrtarisht edhe funksionin e ministrit të Punëve të Jashtme dhe Europës, ka munguar në samitin e NATO-s, që zhvilloi punimet në datat 3-4 prill në Uashington.
Në këtë samit, ku ishin të pranishëm ministrat e Jashtëm të të gjithë vendeve anëtare të NATO-s, si dhe Sekretari i Shtetit, Mike Pompeo, Shqipëria është përfaqësuar me Gent Cakajn, zv.ministër, të cilit i është deleguar pozicioni i kreut të diplomacisë shqiptare nga Rama.
Ky i fundit ka zgjedhur të qëndrojë në Tiranë, të marrë pjesë në seancën parlamentare, të shkojë të prezantojë kandidatët për kryebashkiak në Librazhd dhe Prrenjas, të hedhë batuta ndaj opozitës, duke lënë mënjanë një ndër Samitet më historike të Aleancës së Atlantikut të Veriut.
Shqipëria prej 10 vitesh është anëtare e NATO-s, e themeluar 70 vjet më parë, ndërsa kjo është hera e parë që përfaqësohet në nivel zv.ministri në një takim të tillë.
Zyrtarisht nuk dihen arsyet sepse Rama ka shmangur prezencën në Samitin e Uashingtonit, ku mund të kishte mundësinë të takonte shumë nga figurat më të rëndësishme europiane dhe botërore, përfshi këtu edhe Sekretarin e Shtetit Pompeo.
Në foton familjare, ku në qendër ndodhet Mike Pompeo dhe në krah të tij, zv.ministri Gent Cakaj, të cilit i është deleguar detyra, të gjithë pjesëmarrësit janë krerët e diplomacisë të vendeve që përfaqësojnë.
Ndoshta Rama nuk ka e vlerësuar aq të rëndësishëm përfaqësimin e Shqipërisë në këtë Samit, sa bie fjala në vizitë në Prrenjas apo Librazhd, apo sa batutat në drejtim të opozitës, nga salla e Kuvendit.
Kryeministri që para pak javësh doli me tezën se shkoi në Itali për të folur me mediat italiane për imazhin e cënuar të Shqipërisë nga protestat, nuk e ka parë të arsyeshme që të shkojë dhe takojë ministrat e Jashtëm të vendeve anëtare të NATO-s, të cilët njëherazi janë edhe drejtuesit e diplomacisë së vendeve anëtare të BE-së.
Pyetja që lind është pse Rama nuk ishte i pranishëm në këtë samit, duke qenë se zyrtarisht është ministër i Jashtëm dhe agjenda e tij, qoftë edhe si kryeministër, nuk kishte takime më të rëndësishme sesa takimi që mbahej në Uashington.
Ndoshta me mungesën e tij në Takimin e ministrave të Jashtëm, Rama ka shmangur pyetjet apo përballjet me homologët e tij, drejtues të diplomacive të vendeve të NATO-s, lidhur me situatën që po kalon vendi. /Boldnews.al/
