Një pasqyrë realiste, por edhe një inkurajim për reformat e qeverisë, e ka cilësuar ministri në detyrë i Punëve të Jashtme dhe Europës, Gent Cakaj, raportin e Departamentit të Shtetit për Shqipërinë.
Raport i fundit i DASH thekson se Shqipëria është kthyer në një vend tranzit për drogat e forta dhe bazë e krimit.
“Ministria e Punëve të Jashtme ndonëse është përfaqësuesja e interesave të brendshme të vendit nuk shkëputet nga përgjegjësia për llogarinë e brendshme që duhet të japë për llogarinë e jashtme. Ndonëse kjo që po bëj nga prizmi diplomatik mund të jetë e pakëshillueshme, por institucionalisht është e domosdoshme”, tha Cakaj.
Cakaj tha se kemi rritje të bashkëpunimit ndërkombëtar, raporti thekson faktin se vendi ka arritur rezultate thelbësore në luftën kundër narkotikëve dhe krimit të organizuar për shkak të përpjekjeve për integrim në BE.
“Nuk kemi të bëjmë me mospërmbushje të detyrave, por angazhim e përparim drejt axhendës evropiane. Raporti afirmon se përkundër sfidave dhe vështirësive të shumta, Shqipëria është në moment pozitiv për rezultatet e marra në reformën në drejtësi, pra konfirmon se angazhimi i institucioneve të vendit në situatën aktuale nuk është zgjatim i tranzicionit disa dekadash”, tha ai.
Lidhur me korrupsionin, Cakaj tha se kjo është një e vërtetë e pamohueshme.
“Ndonëse situate është ajo që është, ka një trend reformator në rritje”, tha Cakaj.
Raporti i DASH: Korrupsioni në Shqipëri në të gjitha nivelet e qeverisjes, drogat e forta…
