Kryeministri Edi Rama ka shtyrë sërisht konfirmimin e kandidatit socialist për Bashkinë e Durrësit, edhe pse një ditë më parë organizoi në këtë qytet turin e takimit “bashkia që duam”.
Rama u shfaq me Vangjush Dakon dhe Ardian Çelën në krah, dy emra që konsiderohen si kandidatë në garën e Rilindjes për bashkinë e dytë më të madhe në vend.
Ndërkohë mbrëmjen e djeshme, Kryeministri ka mbledhur disa nga deputetët dhe drejtuesit e institucioneve, në një darkë, ku ishte i pranishëm edhe Drejtori i Ujesjellësit, Spartak Kovaçi, një tjetër emër i lakuar mes socialistëve si kandidat për bashkinë e Durrësit.
Por zyrtarisht Rama as nuk rikonfirmoi Dakon për një tjetër mandat, por as nuk promovoi ndonjë emër që do të pasonte kryebashkiakun e kapur në përgjime me grupe kriminale, për shit-blerjen e votave.
Përpara punonjësve të institucioneve dhe mbështetësve të tij, Rama preferoi të bënte batuta nga opozitës, shprehu mbështetjen për punën e deritanishme të Dakos, tha se duhej punuar më sumë, ndërsa mbylli fjalimin, sapo nga altorpolantët e xhamisë u dëgjua zëri i imamit.
Ky moment është shfrytëzuar nga Rama për të mbyllur takimin, duke mbajtur sërisht pezull Vangjush Dakon. Ndoshta zëri i imamit ka shpëtuar nga Ramën nga pyetjet që mund t’i vinin nga të pranishmit në takim mbi emrin e kandidatit, pasi siç u raportua shumica e të pranishmëve, punonjës të bashkisë, ishin përgatitur të dëgjonin emrin e Dakos. /BN/
