Ish-Kryeministri Sali Berisha e ka cilësuar anëtarësimin e Shqipërisë në NATO si arritjen më të madhe pas pavarësisë së vendit.
Berisha akuzoi kryeministrin aktual, Edi Rama, që gjatë kohës që ka qenë kryetar i opozitës, ka nxjerrë misionarët e tij për të thënë se ftesa për anëtarësim nuk merrej, ndërsa ditën e marrjes së ftesës, ka organizuar protesta me portretet e Enver Hoxhës.
Në një intervistë për TV Klan, socialistët në drejtimin e Edi Ramës, deklaronin se Senati amerikan nuk do të votonte për miratimin e anëtarësimit, ndërkohë që në realitet u votua në unanimitet.
“Partia Socialiste në vitet 92-96 votonte rezoluta kundër anëtarësimit të vendit në NATO”, tha Berisha.
Sipas tij, në këtë 10 vjetor, aeroportet e ushtrisë u shndërruan në baza të trafikut të drogës.
“Shpreh nderimin tim për Ilir Metën dhe Pandeli Majkon që ishin promotorë për anëtarësimin e Shqipërisë në NATO.
Po të ishte për Edi Ramën, Shqipëria nuk anëtarësohej kurrë në NATO. Nuk ka integrim me të as në BE”, tha Berisha.
Sipas tij, me një akt korruptiv, Rama dhe Stephan Fule, bllokuan negociatat me BE në vitet 2011, duke ngritur si problem kryesor Këshillin e Qarkut të Fierit.
Lidhur me ndikimin e rrezikut të ndikimit rus, Berisha theksoi se kryesisht në vendet e Ballkanit Perëndimor është një ndër shqetësimet e Aleancës.
Berisha nuk e mohon që edhe Shqipëria të jetë e ekspozuar ndaj këtij fenomeni, por për referencë merr një deklaratë të Ambasadorit rus në Tiranë.
“Jo rastësisht ambasadori rus përmendi emrin e Kristaq Ramës se ka studiuar në San Petersburg. E rëndësishme është se çfarë kanë në dosjet ruse për atë”, tha Berisha.
Lidhur me protestat e opozitës, Berisha theksoi se mediat ndërkombëtare e kanë mbështetur fuqimisht dhe i kanë transmetuar live, pasi kanë konstatuar problemet e shumta, lidhjet e qeverisë me krimin, lidhjet e ministrave të Brendshëm me drogën, shteti ligjor është zëvendësuar me narko-shtetin.
“Protestat nuk destabilizojnë vendin, përkudrazi promovojnë vlerat”, tha Berisha.
