Kryeministri Edi Rama, ish-ministri damian Gjiknuri dhe kryebashkiaku i Durrësit, Vangjush Dako, janë kapur në përgjime nga agjensitë e huaja ligjzbatuese duke komunikuar me bosët e organizatave që merren me trafik droge.
Deklarata është bërë nga Sekretari për Çështjet Ligjore në PD-së, Çlirim Gjata, sipas të cilit shërbimet e huaja kanë qenë duke përgjuar këto organizata, që merreshin me trafik droge, kur kanë kapur në përgjime komunikimet mes tyre dhe eksponentëve politikë të mazhorancës për blerje votash.
Në emisionin “Provokacija”, Gjata tha se shërbimeve të huaja nuk i interesonte fare çështja e blerjes së votave në Shqipëri, por ato po bënin punën e tyre lidhur me trafikun e drogës.
“Askush nuk i prek dy dosjet e famshme 339 dhe 184. Vetëm dy dosje janë që dimë ne, që kanë dalë kanë marrë dhenë, lere sa ka atje! Përgjimet ku politikanët e lartë të mazhorancës thuhet se kanë komunikim me bosët e bandave në Shqipëri për blerje votash. Çfarë ka ndodhur?!
Shërbimet e huaja kanë përgjuar bandat e drogës, për trafik ndërkombëtar droge dhe i kanë përgjuar për hesap të tyre.
Nuk e dinin ata se po merreshin me blerje votash pasi nuk u intereson shënimeve të huaja partnere çështja e blerjes së votave në Shqipëri, ata kanë problemin e trafikut të drogës.
Duke hetuar këta banda ka dalë se shumë nga eksponatët dhe shefat e këtyre bandave flasin me politikanë të lartë për blerje votash.
Duke filluar që nga Vangjush Dako, ministri Gjiknuri e deri tek Edi Rama ka biseda.
Po po, e kanë thënë vetë prokurorët dhe vetëm majën e ajsbergut kanë nxjerrë BIRN dhe Zëri i Amerikës.
Kjo pjesë e përgjimeve ka ardhur pastaj në Shqipëri dhe janë dy dosjet e famshme 339 dhe 184. Pse nuk hetohen? Nuk po themi pse nuk po i marr t’i arrestojë, t’i dënojë, por kërkojmë t’i hetojë. Por nuk i prek kush me dorë!”, tha Gjata.
