Presidenti Aleksandar Vuçiç është detyruar të pranojë zhvillimin e zgjedhjeve të parakohshme.
Vendimi është marrë nga kryesia e partisë së tij, SNS, e cila shprehu gadishmërinë për zhvillimin e zgjedhjeve të parakohshme parlamentare.
Prej muajsh, Serbia po përballej me protesta popullore, ndërsa Presidenti Vuçiç kundërshtonte kërkesën për zgjedhje të parakohshme.
Lajmi është dhënë nga të gjitha mediat serbe, të cilat njoftojnë se partia e presidentit Alekdandar Vuçiç është e gatshme të zhvillojë zgjedhje të parakohshme. Sipas tyre, vendimi u bë i ditur nga vetë Vuçiç pas një mbledhje urgjente të kryesisë së partisë së tij, SNS.
“Kryesia e SNS-së ishte pro zgjedhjeve të parakohshme, me vetëm një votë abstenim, timen”, deklaroi Vuçiç menjëherë pas kësaj mbledhje.
Ende nuk ka një datë se kur do të zhvillohen zgjedhjet e parakohshme, por Vuçiç ka vazhduar që të jetë i vendosur për të mos u ulur në tryezën e dialogut me drejtuesit e opozitës serbe, Jeremiç dhe Obradoviç.
Një situatë e ngjashme protestash si ajo në Serbi është edhe në Shqipëri. Prej disa muajsh opozita shqiptare proteston dhe kërkon largimin e Edi Ramës nga posti i Kryeministrit, ndërsa ky i fundit njëlloj si në rastin e Presidentit Vuçiç, kundërshton kërkesën për zgjedhje të parakohshme.
Nuk dihet nëse pas vendimit të partisë së Vuçiç për të pranuar zgjedhje të parakohshme, do të ketë ndryshim në qëndrimin e Rilindjes së drejtuar nga Rama.
