Ish-deputetja e Partisë Demokratike, Dhurata Çupi, u shpreh se me Edi Ramën kryeministër nuk mund të ketë zgjedhje lokale dhe as të përgjithshme.
Ajo foli edhe për dy letërporositë e ardhura nga SHBA dhe Skocia, ndërsa tha se PD-ja nuk ka fshehur asgjë dhe të gjitha shpenzimet janë deklaruar në Komisionin Qendror të Zgjedhjeve.
Sipas Çupit, Prokuroria e Tiranës ka bërë veprime të paprecedenta duke shtuar se ka nxjerrë përfundime pa kryer më parë asnjë hetim mbi rastin e pretenduar për lobimin e selisë blu në Shtetet e Bashkuara të Amerikës dhe lidhjet e mundshme me Rusinë.
“Basha ka deklaruar para mediave ashtu siç ka deklaruar edhe në Prokurori. Është hera e parë që Prokuroria ka nxjerrë përfundime pa bërë hetime. Letër porositë e ardhura si nga SHBA ashtu edhe nga Skocia, janë porosi që janë deklaruar edhe në faqen zyrtare. Konkluzionet e Prokurorisë janë të paprecedenta përgjatë 30 viteve demokraci. Prokuroria po përdoret politikisht”, tha ajo.
Ajo foli edhe për aksionet politike dhe protesta e opozitës së bashkuar. Demokratja theksoi mes tjerash se qytetarët shqiptarë po tregojnë nga dita në ditë se janë të pa përfaqësuar nga kjo maxhorancë. Por ndryshe nga herët e tjera, PD-ja ka vendosur për protestë kombëtare me 13 prill, e cila do të fillojë në orën 18:00, ndërsa Çupi tha se kjo orë është vendosur për të shmangur temperaturat e larta.
