Disa qindra automjete kanë transportuar anëtarë të PS-së dhe punonjës të administratës publike nga rrethe të ndryshme të vendit për të mbushur karriget e vendosura në sheshin ‘Nënë Tereza’ në Tiranë ku Erjon Veliaj shpalli rikandidimin për kryebashkiak.
Prej ditësh janë raportuar rastet sesi po ushtrohej presion nga zyrtarë të niveleve të larta në drejtim të administratës për të marrë pjesë në Kongresin e PS-së, i cili më tepër se sa një mbledhje e gjerë partie, i ngjante një anti-mitingu për të treguar forcën e Kryeministrin Edi Rama përballë protestave opozitare.
Mediat kanë raportuar raste kur përmes email-eve apo sms, punonjësve të administratës u kërkohej që të shtunën të ishin në Tiranë. Dhe jo vetëm kaq, por që secili prej tyre të mund të sillte në Kongresin-miting të Rilindjes minimalisht 10 persona.
Shifrat dhe ajo çka u pa tregoi se presionet nuk kanë funksionuar, pasi nga tërë Shqipëria, përfshi këtu edhe mijëra punonjës të administratës të detyruar të jenë prezent në Kongres-mitingun e Ramës, numri i pjesëmarrësve sërisht nuk ishte ai që pritej, të paktën nga selia e PS.
Në dallim nga çdo Kongres tjetër i PS-së, këtë rradhë Rama dhe të tjerë drejtues të PS-së, kishin menduar të organizonin gjithçka me pompozitet, në formën e një spektakli, si për të treguar një anë krejt tjetër nga ajo që ndodh në realitet.
Ndoshta kjo ishte arsyeja që në pjesën më të madhe të fjalimit të tij, Kryeministri humbi qetësinë dhe në vend të llogaridhënies apo një ndjese, zgjodhi të sulmojë gjithkënd që nuk është në krahun e tij, apo që sipas tij, nxin atë që në sytë e Ramës shkëlqen.
