Policia e Shtetit reagoi dhunshëm sot ndaj pjesëtarëve të 4 familjeve, përfshi këtu edhe gra e fëmijë.
Pamjet e transmetuara do të mbahen mend gjatë, teksa dhjetra forca policore rrethuan jo më shumë se 15 banorë, pjesa më e madhe gra, madje edhe shtatzana dhe fëmijë.
Kritika ndaj policisë shprehu edhe ministri i Brendshëm, Sandër Lleshaj, sipas të cilit policia nuk u tregua efikase.
Kryeministri Rama nxitoi të akuzojë mediat se kanë ngatërruar gjithçka, pasi qeveria e tij nuk mund të dalë mbi vendimet e gjykatave.
Në fakt situata e krijuar mund të ketë shkak vendimin e gjykatës, por sjellja e policisë dhe dhuna e përdorur nuk ka lidhje me këtë.
Policia e Shtetit varet drejtpërsëdrejti nga Qeveria, është e njëjta që hedh gazin në protestat e opozitës, e njëjta që harton listat për të ndaluar protestuesit që i prishin qetësinë Kryeministrit, e njëjta që merret me shitës ambulantë, e dhjetra raste të tjera.
Është e njëjta polici që sot goditi nëna e baballarë në sy të fëmijëve të mitur, që përpiqeshin me aq sa mundnin të shpëtonin prindërit.
Dhe skenat që ndodhën sot nuk janë larg 8 marsit! Vështirë se mund të jenë harruar momentet kur Kryeministri Rama në Fier thërriste nënat, gratë dhe vajzat t’I bashkoheshin dhe të kërcenin bashkë me të dhe të festonin.
Videot dhe fotot u shpërndanë me shpejtësi, teksa Rama shfaqej i lumtur.
Festa mbaroi, sot policia e Ramës nuk u kursye ndaj nënave dhe grave.
Fatkeqësisht, pas festës në Fier, në Tiranë kërciti druri…
