Prej muajit tetor, Prokuroria e Tiranës është duke hetuar për zbardhjen e përplasjes në ish-Bllok, ndërsa i vetmi, i cili është në burg, është Ervis Martinaj, për të cilin hetimet e Akuzës shkuan më larg se vetëm përplasja me armë në 4 tetor.
Fillimisht, Gjykata dha vetëm 30 ditë burg për të, por pas ekspertimit të telefonit të 36-vjeçarit, u zbuluan mesazhe që e komprometonin në konfliktin me armë, si person, i cili ka njoftuar miqtë e tij të shkonin me armë në vendin ku ndodhi ngjarja e rëndë. Por Prokuroria i shtoi edhe një tjetër akuzë, atë të “Pastrimit të veprës penale” ose veprimtarisë kriminale, kjo për shkak të transfertave dhe shumave që Martinaj disponon, ndërkohë që nuk arrin t’i justifikojë dot. “Deri në këtë moment procedural, rezulton se shtetasi Ervis Martinaj, prej vitit 2009 dhe në vijim, ka blerë pasuri në vlera të konsiderueshme.
Mënyra e shlyerjes është kesh, burimi i të ardhurave është i papërcaktuar dhe nuk mund të justifikohet me burimet e ligjshme që ka ky shtetas. Po ashtu, ai rezulton se zotëron disa shoqëri tregtare, të cilat janë të gjitha pasive dhe nuk ushtrojnë aktivitet”, pretendon Prokuroria. Ndërkohë, në lidhje me zbardhjen e motiveve të përplasjes me armë, gjatë muajit nëntor, pas hetimeve, Prokuroria bëri të ditur se është në kërkim të një personi tjetër për këtë çështje, Eldi Dizdarit, për të cilin ka dyshime se mund të jetë personi që ka pasur konfliktin me Matën. Sipas burimeve, Dizdari mendohet se është personi, në makinën e të cilit dyshohet se ishin personat që Mata, i dorëzuar dje, pati konflikt vetëm pak minuta para përplasjes. Gjithashtu, burime bëjnë me dije se hetimet janë drejtuar edhe në pistën e bashkëpunimit në biznes dhe prishjes së kontratave të bashkëpunimit.
TË IMPLIKUARIT
Në lidhje me ngjarjen pati shumë arrestime, ndërsa pjesa më e madhe e tyre, janë lënë nga gjykata në masën e sigurisë “Detyrim paraqitje”, pasi pas hetimeve, ka rezultuar se nuk kanë qenë të implikuar drejtpërdrejt në konflikt. Kështu, i vetmi që ndodhet nën masën “Arrest në burg” është Martinaj, ndërsa të shpallur në kërkim janë dy persona, komandoja Mevjol Bilo dhe biznesmeni Eldi Disdari, emri i të cilit doli shumë vonë nga hetimet, ndërsa konsiderohet si personi që ka nisur fillimisht sherrin. Gjatë këtyre muajve, në Polici u dorëzuan më herët, edhe Ajaks Boshnjakun dhe Gledio Hoti, ndërsa të dy u liruan nga Gjykata.
Ajaks Boshnjaku, ka thënë se është ftuar nga Redi Popescu atë mbrëmje, për të pirë ndonjë gotë verë, ndërsa pasi kanë qëndruar pak atje, në lokal ka ardhur një grup personash, ku një prej tyre i është drejtuar Mevjol Bilos, duke e sharë dhe kërkuat llogari se pse po e shikonte. Edhe Hoti, rezultoi se kishte qenë rastësisht në vendin e ngjarjes. “Nuk kam qëlluar askënd, ishim në lokal me Ervin Matën, Mervjolin dhe Redi Popescun. Ai na qerasi me një verë. Erdhe dy persona qe s’i njihja filluan të thonë askush mos lëvizë e nxorën armët. Ne atë moment u shtriva poshtë tavolinës nga frika. Në Greqi ika se do merrja një pajisje, jo ti fshihesha hetimit”, ka thënë ai. /Panorama/
