“Kur do flasim” ishte shprehja që Edi Rama e përdori për herë të parë gjatë protestës së studentëve, ndërsa më pas kaloi në fazën e kapjes së lëvizjes së tyre, e cila zgjati për mbi dy muaj dhe u shua në mënyrë të habitshme.
Të njëjtën shprehje, Rama përdori sot gjatë Samitit të Diasporës, duke iu drejtuar opozitës, e cila ka radikalizuar lëvizjen e saj, duke dorëzuar mandatet e deputetëve dhe duke u vënë në krye të protestave popullore. Opozita e bashkuar kërkon një qeveri tranzitore, pa Edi Ramën Kryeministër. Ndërkohë që socialistët kanë pozicionin e tyre për të mos lëshuar pe, madje këmbëngulin për zgjedhje parlamentare jo para 2021.
Ndërkombëtarët pas kritikave të ashpra ndaj opozitës për bojkotin dhe djegien e mandateve, kanë apeluar për dialog mes palëve, ndërsa një delegacion i PE-së që vizitoi Tiranën, dukej tërësisht i pafuqishëm për të hyrë ndërmjetës në zgjidhjen e krizës politike. Shumica e opinionistëve shqiptarë, qofshin edhe ata të afërt me Kryeministrin Rama, po artikulojnë idenë e një zgjidhjeje politike.
Pozita dhe opozita në kushtet aktuale duken në pozicione “lufte”, ku asnjëra palë nuk lëshon terren, edhe pse përplasjet e ndodhura deri më tani, kanë prodhuar incidente të vogla.
Idea që qarkullon së fundmi është që negociator për zgjidhjen e krizës të jetë Presidenti Ilir Meta. Ky i fundit as e ka pohuar as e ka mohuar marrjen e një roli të tillë, ndërsa ish-deputetët e LSI-së e kanë mbështetur.
Ministri i Bujqësisë Bledi Çuçi ndër të tjera se mazhoranca është e hapur për dialog me opozitën, madje shtoi se ata nuk kanë asnjë lloj kompleksiteti nëse kreu i Shtetit Ilir Meta merr rolin e negociatorit.
“Vetë kryeministri ka përmendur shprehjen e tij të famshme: “Kur do flasim?”. Ne s’kemi pasur kompleks nga Presidenti. Ai ka treguar se nuk është shumë komod me zgjedhjet tona, edhe pse ka qenë në shkelje të Kushtetues, ka pasur kompleks ta pranojë këtë”, u shpreh Çuçi.
