Më 1 mars përfundon afati i hetimeve të Prokurorisë së Krimeve të Rënda ndaj ish-ministrit të Brendshëm, Sajmir Tahiri, referuar vendimit të dhënë nga Gjykata e Krimeve të Rënda.
Në këto kushte prokurorët e çështjet brenda 1 marsit duhet të shprehen nëse do të mbyllin hetimet, e nisura 2 vjet më parë, apo do të çojnë dosjen në gjykatë.
Në varësi të vendimit të Prokurorisë, ish-ministri i Brendshëm, ka 10 ditë afat për të ankimuar pretendimet e prokurorisë.
Më datë 10 mars do të jetë gjyqtari i Krimeve të Rënda ai që do të vendosë përfundimisht nëse çështja për Tahirin do kalojë në gjykim, apo për të do të mbyllen hetimet.
Prokuroria kërkoi shtyrjen e hetimeve edhe me 3 muaj, duke përsëritur të njëjtën kërkesë për herë të 4-të. Sipas organit të akuzës, duhej më shumë kohë për mbërritjen e disa letër porosive nga Italia dhe Mali i Zi.
Tahiri është nën hetim pasi akuzohet se ka qenë pjesë e grupit kriminal “Habilaj”, të cilët po gjykohen në Itali. Ai po hetohet për dy akuza: trafikimin e narkotikëve të kryer në bashkëpunim, në formë të posaçme të grupit të strukturuar kriminal dhe korrupsion pasiv.
