Kryetari i Partisë Demokratike, Lulzim Basha, do të mbledhë pasditen e sotme drejtuesit e degëve të kësaj partie, një ditë pasi Kryesia miratoi strategjinë që do të ndiqet pas dorëzimit të mandateve të deputetëve.
Në mbledhjen e sotme pritet të përcaktohet kalendari i protestave që do të zhvillohen në qytetet kryesore të vendit, ndërsa Basha deklaroi dje se zgjedhjet janë në prag dhe duhet të jemi të përgatitur.
Në këtë kuadër, duket se Basha do të kërkojë nga drejtuesit e degëve të PD-së që krahas përgatitjeve për protesta dhe koordinimit me kolegët e tyre të partive opozitare, të përgatiten edhe për zgjedhje.
Po kështu strukturat e PD-së do të angazhohen dhe do të kenë në vëmendje sqarimin e qytetarëve mbi programin e PD-së, ku nuk do të mungojnë komunikimet me grupet e interest.
Dy ditë më parë, deputetët e opozitës zyrtarizuan dorëzimin e mandateve të deputetëve, një hap ky që është konsideruar ekstrem.
Basha zhvilloi dje një vizitë në Vjenë ku mësohet se ka pasur takime me një grup kongresmenësh dhe senatorësh amerikanë, por edhe me drejtues të OSBE-së.
Javën e ardhshme pritet një tjetër vizitë e Bashës në Berlin, ku priten takime me deputetë dhe figura të rëndësishme të CDU/CSU.
