Nga Boldnews.al
“Rilindja” ka dalë hapur në mbrojtje të deputetit opozitar, Lefter Koka, i cili refuzoi të bashkohej me kolegët e tij në nismën për dorëzimin e mandateve.
Në rrjete sociale dhe në komente mbi lajmet e agjencive mediatik on-line konstatohen një numër i madh komentesh në mbrojtje të vendimit të Kokës, në shumicë dërrmuese nga njerëz të administratës publike.
Prej kohësh, punonjës të administratës duket se paguhen me paratë e taksapaguesve vetëm për të mbrojtur imazhin e shkatërruar të ‘Rilindjes” në rrjete sociale.
Për të paraqitur një shembull konkret, mjaftojnë vetëm fotot që shoqërojnë këtë shkrim. “Boldnews.al” publikoi të premten një artikull me titull: “Edi Rama shpërblen njeriun-incenerator të Lefter Kokës”. Artikulli sillte në vëmendje të publikut se Alqi Bllako, një prej bashkëpunëtorëve më të afërt të deputetit të LSI-së, Lefter Kokës, pret emërimin nga kryeministri Edi Rama në postin e Drejtorit të Përgjithshëm të Ujësjellës-Kanalizime.
Pas publikimit të këtij artikulli, punonjës të administratës u angazhuan në mbrojtje të Lefter Kokës.
Ernest Ndreca është një prej komentuesve, i cili kritikon “Boldnews.al” pse është marrë me Lefter Kokën. Ndreca, sipas profilit të tij në “Facebook” rezulton zyrtar i Këshillit të Qarkut Lezhë, institucion i drejtuar nga Partia Socialiste.
Një tjetër komentues, i identifikuar si “Igli Tirana” shpreh keqardhjen e tij se përse bëhen shkrime kritike ndaj Lefter Kokës. “Igli Tirana” duket që është një profil anonim, por gjithësesi rezulton se ka lidhje me Partinë Socialiste të Tiranës.
Pra, duket qartë se “Rilindja” ka lëshuar “skalionet” e saj on-line në mbrojtje të Lefter Kokës. Hipokrizi e plotë!
