Opozita pritet të zhvillojë para selisë së Kuvendit të Shqipërisë protestën e rradhës, e cila do të nisë rreth orës 10:00, pothuajse në të njëjtën kohë kur do të nisë punimet seanca plenare.
Ndërkohë zbardhen masat e Policisë së Shtetit për mbrojtjen e godinës së Parlamentit.
Në operacion do të jenë të angazhuar 1000-1200 punonjës të policisë dhe gardës, ndërsa trupat special, FNSH dhe Shqiponja, do të jenë të pozicionuara përgjatë bulevardit “Zhan D’ark”.
Mësohet se në gadishmëri do të jenë edhe forcat zjarrfikëse, si dhe shërbimi i urgjencës.
Pak a shumë policia dhe garda do të zbatojë të njëjtin plan masash si në protestën e 16 shkurtit. Mbrojtja e institucionit do të bëhet me gardhe policore, do të synohet shmangia e përplasjes, dhe nëse do të ketë tentative të protestuesve për të kaluar uniformat blu, do të përdoret gazi për shpërndarjen e turmës.
E ndërsa Avokati i Popullit ka kërkuar sqarime mbi llojin dhe përqnëdrimin e gazit që u përdor në protestën e 16 shkurtit kundër protestuesve, kjo pasi pasojat në shëndetin e tyre ishin të shumta, policia do të përdorë të njëjtin gaz kimik.
Mësohet se forcat e sigurisë do të përqëndrohen në oborrin e godinës parlamentare, ndërsa në pikat e larta rreth zonës do të ketë prani të forcave të Gardës, nga ku mendohet që të lëshohet edhe gazi lotsjellës.
