Disa mijëra mbështetës të opozitës dhe qytetarë janë nisur prej orëve të para të mengjesit të sotëm drejt Tiranës, për të marrë pjesë në protestën e thirrur në orën 11:00 para godinës së Kryeministrisë.
Nga raportimet e para mësohet se nga Qarku i Shkodrës janë organizuar rreth 5 mijë persona, ndërsa nga Gjirokastra rreth 1 mijë. Po kështu nga Fieri, Vlora, Korça, Elbasani, Kukësi, Dibra, Durrësi janë disa mijëra të tjerë që i janë përgjigjur thirrjes së opozitës.
Siç mësohet punonjës të policisë së Shtetit kanë filmuar qytetarët që në mënyrë të organizuar po nisen drejt Tiranës, çka duket se ka shkaktuar përplasje verbale mes palëve. Protestuesit e konsiderojnë këtë veprim të policisë si një provokim, ndërsa sipas policisë përmes filmimeve synohet të evidentohen nëse mes protestuesve do të ketë ose jo persona me preçedentë.
Një incident i tillë raportohet të ketë ndodhur në Kryebushat në Shkodër, ku nga ana e policisë është kërkuar një listë me emra të protestuesve.
Në anën tjetër në Tiranë do të jenë në gadishmëri rreth 1300 forca policore, nga të cilat 900 dislokohen pranë Kryeministrisë.
Protesta e thirrur pritet të jetë një nga më të mëdhatë në 28 vjet, ndërsa ajo do të jetë pa afat. Një variant është që protestuesit të mbajnë të rrethuar godinën e Kryeministrisë, por duket se policia ka marrë masat duke vendosur kangjella në anënt anësore të godinës. /Boldnews.al/
Tension ne Kryebushat on Vidnews.
