Nga Boldnews.al
Një tjetër institucion i drejtësisë mbetet bosh, për shkak të procesit të Vetingut. Prokuroria e Apelit për Krime të Rënda, struktura që po shqyrton disa prej çështjeve më të rëndësishme të krimit të organizuar dhe korrupsionit, prej së Enjtes nuk ka më asnjë prokuror.
Prej kohësh, ky institucion funksiononte vetëm me dy prokurorë-Artan Bajramin në postin e drejtuesit dhe Bujar Sheshi (Shesha) prokuror i thjeshtë.
Në Dhjetor 2018, Bujar Sheshi zgjidhet anëtar i Këshillit të Lartë të Prokurorisë, një pozicion me kohë të plotë që e detyron atë të mos ushtrojë funksionet e prokurorit.
Ndërkohë, të Enjten, Komisioni i Pavarur i Kualifikimit vendosi shkarkimin e Artan Bajramit, për shkak të problemeve me pasurinë. Në këtë mënyrë, Prokuroria e Apelit për Krime të Rënda mbyll dyert, të paktën për disa ditë, derisa Këshilli i Lartë i Prokurorisë të caktojë përkohësisht prokurorë të tjerë që do të ushtrojnë funksionet në atë institucion.
Në fillim të vitit 2018, Prokurorja e Përgjithshme e Përkohshme, Arta Marku, atashoi pranë kësaj strukture prokuroren e Apelit të Shkodrës, Besa Nikëhasani. Por kjo e fundit qëndroi vetëm pak kohë në atë detyrë, pasi u shkarkua nga Vetingut, në maj të vitit 2018.
Situatën problematike në Prokurorinë e Apelit për Krime të Rënda e ngriti në mbledhjen e Këshillit të Prokurorisë pak javë më parë anëtari Bujar Sheshi. Me largimin e tij, ajo njësi e prokurorisë mbeti vetëm me një prokuror, drejtuesin Artan Bajrami.
Por, pavarësisht ngritjes së shqetësimit para rreth 3 javësh, Këshilli i Lartë i Prokurorisë nuk kishte hapur deri më tani procedurën për rekrutimin e përkohshëm të prokurorëve për të qenë pjesë e Apelit për Krime të Rënda.
Tashmë, Këshilli i Lartë i Prokurorisë është në kushtet e emergjencës për të ndërhyrë në këtë situatë ekstreme në të cilën gjendet një prej njësive më të rëndësishme të Prokurorisë Shqiptare.
