Kupa është mbushur, është mbushur dhe po derdhet! 16 shkurti do të jetë ditë mësimi historik dhe mësimi do të jetë ky, që ky vend është i popullit dhe nuk do të lejohen 5 njerëz që të zhvasin pasuritë e shqiptarëve.
Deklarata është bërë nga kreu i PD-së, Lulzim Basha, gjatë mitingut të zhvilluar në Pogradec, ku ftoi qytetarët t’I bashkohen protestës së opozitës.
“Të gjithë qeveritarët e korruptuar si minjtë në çark do t’i zëmë më 16 Shkurt dhe do t’i çojmë para drejtësisë.
Më 16 shkurt jepini një mësim çdo qeverie tjetër se me popullin nuk luhet, se durimi ka marrë fund dhe koha e fjalëve ka marrë fund!
Evropa po na vëzhgon!
Ejani dhe jepni verdiktin përfundimtar të shtunën në Tiranë”, tha Basha.
Më herët, Basha zhvilloi takime me qytetarët ku dëgjoi problemet dhe pretendimet e tyre mbi aksionin opozitar.
“Si ty, 290 mijë shqiptarë hanë një herë në ditë. Këtu në Pogradec janë afërsisht 2 mijë biznese. 5000 janë mbyllur në një vit nga taksat. 400 familje janë hequr nga ndihma ekonomike. Sapo hyn në qytet ke atë të betonit që me letra bën 12 milionë euro.
Zgjidhja është në dorën tënde. Me ato 12 milionë euro mund të dyfishohej pensioni për të gjithë pensionistët e Pogradecit. Mund të trefishohej ndihma ekonomike për familjet në nevojë në të gjithë qarkun e Korçës.
Mund të hapeshin vende pune me 300 mijë lek për 2 mijë persona. Në vend që të ndodhnin këto, ke një monument betoni me të cilin gjysmat i vjedh Edi Rama. 5 veta vjedhin të gjithë shqiptarët.
Ti je në mes të katër rrugëve, vajzën pa punë, pa ndihmë ekonomike. Ju s’keni më bukë për të ngrënë.
Ne mund ta ndryshojmë këtë. Që këto para të vijnë tek ju. Në vend që t’ju vihet grushti në kokë, t’ju japim të drejtën tuaj.
Asgjë nuk do të zgjidhet nëse në krye të vendin ke një njeri që i trajton njerëzit si qenër. Sepse, paratë tuaja i fut në xhepat e tij. Asgjë nuk zgjidhet nëse nuk jemi bashkë. Nëse jemi bashkë do të keni një qeveri që ju shtrin dorën!”, theksoi ndër të tjera Basha.
