Kryeministri Edi Rama dhe qeveria e tij duket se kanë zgjedhur rrugën e populizmit sa herë ka një reagim qytetar, lidhur me projekte të ndryshme.
Protesta e studentëve e nisur më 5 dhjetor duket se zgjoi brenda qeverisë populizmin, përmes të cilit tentohet ti jepet një zgjidhje e shpejtë një problem, thjesht dhe vetëm për të ulur tensionet.
Kjo u pa me reagimin e Ramës dhe qeverisë që drejton ku brenda një dite miratoi një seri vendimesh, përmes të cilave artikuloi zgjidhjen e problemeve të studentëve apo kërkesave të tyre. Qeveria nuk u mendua shumë, thjesht u hartuan vendimet, u shpërndanë dhe problem u konsiderua i zgjidhur.
Askush nuk e vrau mendjen se vendimet mund të binin ndesh me Kushtetutën, ligjin e Arsimit të Lartë, apo ligje të tjera që cënonin autonominë e Universiteteve. Thjesht u gjet një mënyrë për të minimizuar reagimin studentor dhe atë të pedagogëve.
E njëjta gjë ndodhi me ministren e re të Infrastrukturës dhe Energjisë, Belinda Balluku, lidhur me protestën e banorëve dhe qytetarëve në kanionin e Holtës.
Lidhur me HEC-et, Balluku tha se janë 182 kontrata që i korrespondojnë 440 HEC-eve dhe vetëm 96 hidrocentrale janë operative.
“Ato u përkasin 73 kontratave koncesionare dhe kjo përbën një arsye për një vëzhgim të detajuar të të gjithë kontratave ende jo operative, në funksion të një sërë konkluzionesh të nevojshme për të gjykuar strategjinë e këtij sektori, efikasitetin e politikës së ndjekur në vite për stimulimin e HEC-eve të vogla, ndikimin ekonomik dhe social të tyre dhe me radhë. Në këto kushte, kur kemi shumë më shumë kontrata ende jo operative, sesa operative, është koha të bëjmë një ndalesë dhe të gjykojmë për vazhdimësinë”, tha Balluku.
Por vetëm kaq, nuk u miratua as nuk u bë public ndonjë vendim i shkruar, përmes të cilit të tregohej serioziteti i asaj çka thuhej.
E njëjta gjë ndodhi me anullimin e konçensionit të rrugës Thumanë-Kashar, për të cilin qeveria tha se fondi do të kalojë për atë që e quajti Pakti për Universitetet. Por në fakt në buxhetin e shtetit për 2019 për Thumanë-Kashar nuk është caktuar asnjë fond.
E njëjta situatë po paraqitet kudo, sa herë ka një reagim qytetar, madje është kthyer në një model edhe për nivelin lokal.
Kështu u veprua edhe me ngjarjen e Kavajës, ku një e mitur u dhunua nga një grup adoleshentësh, ndërsa protagonizmin e mori ministrja Spiropali.
Në këtë mandat të dytë, duket se Rama dhe ministrat e tij kanë zgjedhur rrugën më të thjeshtë, atë të reagimit të menjëhershëm sikur po anullojnë apo tërhiqen nga një projekt apo konçension, ndërkohë që gjithçka më pas nuk shoqërohet me akte ligjore apo vendime.
E vetmja gjë që mund të shkaktojë ky lloj populizmi është trembja e investitorëve, ose dërgimi i një mesazhi që më shumë ngjan me një gjobvënie në distancë… /Boldnews.al/
