Skandali etik dhe ligjor i ministres së Shtetit, Elisa Spiropali, e cila identifikoi me video prindërit e të miturës së dhunuar seksualisht në Kavajë, shkaktoi reagimin dhe indinjatën e opinionit publik.
Të vetmit që nuk kanë reaguar janë institucionet përgjegjëse për evidentimin e parandalimin e këtyre shkeljeve dhe një numër i lartë shoqatat “joqeveritare” , të cilat vjelin çdo vit fonde të huaja për projekte në mbrojtje të fëmijëve.
Paraditen e së Dielës, disa organizma që mbrojnë të drejtat e grave, ndërmorën një iniciativë modeste duke organizuar një shëtitje-protestë, ku dënohej dhuna ndaj të miturës.
Përveç një pankarte ironizuese për Spiropalin, nuk kishte asgjë tjetër në këtë protestë për të dënuar, të paktën moralisht, veprimin alogjik të Elisa Spiropalit.
Moria e shoqatave të ndryshme, të cilat përbetohen për sensibilizimin e opinionit publik për të mbrojtur të drejtat e njeriut, prej tre ditësh nuk kanë asnjë kritikë ndaj ministres së Shtetit.
Qeveria e Edi Ramës dhe elementët e tij përbërës, të quajtur “ministra”, duket se kanë efekt hipnotizues ndaj “shoqërisë civile”. Aktivistët e tyre, të cilët zaptojnë hapësirat mediatike e publike për rastet e dhunës ndaj fëmijëve në Siri, Afganistan apo Kinë, kësaj radhe nuk kanë gjetur kohën për të ngritur zërin e denoncuar sjelljen anti-etike dhe anti-ligjore të Spiropalit.
Ndërkohë, institucionet përgjegjëse, ato të pavarurat, që monitorojnë dhe penalizojnë shkeljet ligjore në identifikimin e të miturve të dëmtuar nga veprat penale, nuk kanë arrritur të shohin videon skandaloze të Spiropalit, pamjet e të cilës u shpërndanë në të gjitha mediat, nëpërmjet valëve të televizionit qeveritar, “ERTV”.
Komisioneri për Mbrojtjen e të Dhënave Personale u detyrua të jepte një koment për ngjarjen vetëm pas interesimit të një televizioni në Tiranë. Por, edhe ajo përgjigje ishte më shumë mos-përgjigje-. “Do e shohim videon dhe do e vlerësojnë nëse ka vend për nisjen e një hetimi administrative”, u përgjigj zyrtarisht institucioni i Komisionerit.
Ndërkohë, nga Prokuroria, institucion që duhet të niste hetimin për shkeljen e të paktën dy neneve të Kodit Penal në videon e publikuar nga Spiropali dhe “ERTV”, nuk ka asnjë reagim.
Në fakt, askush nuk pret reagim nga Prokuroria. Ajo, prej kohësh, nuk ka vullnetin dhe nuk guxon të ndërmarrë veprime ligjore për “Rilindasit”. /Boldnews.al/
