Deputeti demokrat Luçiano Boçi ka reaguar lidhur me deklaratat e Kryeministrit Edi Rama në një takim me studentë të mjëkësisë.
“Herë duke lyer me miell hundët, herë këmbët e herë me akullore, made in Gjushi, duart, “Ujku me të bardha”, kërkon të mashtrojë, por dhe të nëpërkëmbë studentë e pedagogë”, shkruan Boçi në një postim në rrjetet sociale.
Postimi i deputetit Luçiano Boçi
UJKU ME TË BARDHA
I shfazuar dhe i çorientuar u shfaq Rama në takimin e stisur me studentët, tek konviktet e Mjekësisë.
Më shumë ngjante si përpëlitje.
Në çdo takim me studentët, ai merr atë pamjen Ujkut të përrallës që donte të mashtronte në dëshpërim e sipër, kecat.
Herë duke lyer me miell hundët, herë këmbët e herë me akullore, made in Gjushi, duart, “Ujku me të bardha”, kërkon të mashtrojë, por dhe të nëpërkëmbë studentë e pedagogë.
Asnjë zgjidhje ligjore nuk ofron për kërkesat e studentëve.
Vetëm nxitje e tyre për një pëplasje me pedagogët, të cilët vazhdon e i trajton e dhunon sikur të ishin pjesë e administratës së vet.
Ndërkohë qarjet e tij për 4 studentë në një dhomë nuk vlejnë.
Mashtron me shumën që është vetëm për disa godina. Mashtron dhe me cilësinë.
Marrëveshja me KFË, zbulon se është dakortësuar si prioritare, ndërtimi i dhomave me 8 studentë me një banjë e vetëm disa me 4 e fare pak me 2 studentë.
Pjesë nga relacioni që shoqëron marrëveshjen në foto e vërtetojnë këtë!
Asnjë ulje tarife për masterin, kur dihet që ndarja në cikle sipas marrëveshjes së Bolonjës, nuk përjashton aspak detyrimin e shtetit për të subvencionuar masterin.
Shpërfillje për peshën e përfaqësimit dhe vendimmarrjes studentore.
Karta e studentit, është një tjetër lloj mielli që përdor Rama, sepse për të nuk janë parashikuar fonde më vete, siç e përcakton ligji i tij i mielltë.
Pakti i tij gjoja për Universitetin, është diskretituar tashmë si pakt i kërkuar armëpushimi për qeverinë e tij dhe si pakt për të shpallur luftë ndaj pedagogëve me VKM antiligjore dhe antikushtetuese.
Ujkut nuk i bën më punë as “mielli”!!!