Ajo që është denoncuar vazhdimisht si një cenim i sovranitetit kombëtar të vendit, marrëveshja Detare me Greqinë, duket se po jep efektet e para në kurriz të shqiptarëve. Ndarja a hapësirës detare është e pabarabartë dhe më në fund Athina do ketë të drejtën e saj të zgjerojë kufirin ujor duke synuar zonat ekskluzive ekonomike të pashfrytëzuara në Jon, përmes marrëveshjes patransparencë Bushati-Kotzias.
Ministri i Mbrojtjes së Greqisë Panos Kammenos ka deklaruar gjatë një aktiviteti në Athinë se së shpejti Greqia do të zgjerojë ujërat territoriale. Ai theksoi se Greqia do të zgjerojmë ujërat territoriale për të marrë pasurinë nën det, por pa specifikuar ku.
“Ne jemi në një moment të rëndësishëm në historinë e kombit, shumë shpejt do të “zgjerojmë” ujërat tona territoriale, njohjen e ZEE, shfrytëzimin e pasurisë nënujore dhe vendi ynë do të hyjë në një epokë të re. Ne po dalim nga kriza financiare dhe në të njëjtën kohë Greqia është shndërruar në një vend që prodhon gaz dhe ndoshta edhe më vonë naftë“, ka thënë ministri grek i Mbrojtjes.
Ministri grek i Mbrojtjes gjatë fjalës së tij nuk ka specifikuar se për cilat territore bëhet fjalë, ndërsa deklarata e tij vjen në një moment që Athina zyrtare është në bisedime me Shqipërinë për kufirin detar dhe zonat ekonomike. Referuar deklaratave të ministrit Kotzias pak javë më parë, marrëveshja mes Shqipërisë dhe Greqisë për kufirin detar pritet që të arrihet brenda qershorit.