Shqiptarët mbajnë rekordin e kërkesave për azil në Francë, gjatë vitit 2017. Pavarësisht justifikimeve dhe kërcënimeve të kryeministrit Edi Rama, qytetarët shqiptarë vijojnë të kërkojnë zgjidhje për jetën e tyre jashtë vendit. Në tre vitet e fundit, Eurostat ka regjistruar zyrtarisht mbi 100 mijë kërkesa për azil nga shqiptarët, shumica absolute e të cilave janë refuzuar nga autoritetet e vendeve të ndryshme europiane.
Në shifrat e Eurostat nuk janë të përfshira të dhënat mbi emigrantët shqiptarë, të cilët kanë mbërritur në territorin e Bashkimit Europian dhe nuk kanë aplikuar për leje qëndrimi. Eurostat ka publikuar të dhënat zyrtare për vitin 2017, nga ku rezulton se shqiptarët mbajnë vendin e parë për aplikimet për azil në Francë, me plot 11.395. Pas shqiptarëve renditen afganët me 6555 aplikime dhe lista vijon me azil-kërkuesit nga Haiti, Sudani, Siria, etj. Gjithashtu, shqiptarët janë në top-listën e kërkesave për azil në Belgjikë. Gjatë vitit 2017, autoritetet e këtij vendi kanë regjistruar 670 aplikime nga qytetarë shqiptarë, shifër e cila është e përafërt me kërkesat nga afganët, sirianët dhe palestinezët.
Në total, gjatë vitit 2017, Eurostat raporton për rreth 22 mijë kërkesa për azil nga shqiptarët në të gjithë vendet e Bashkimit Europian. Kjo shifër është më e ulët, krahasuar me vitin 2015-2016, por gjithësesi vijon të jetë shqetësuese për vendet e Bashkimit Europian. Gjermania, një prej vendeve më të prekura nga fenomeni shqiptar i azil-kërkuesve në tre vitet e fundit, po aplikon politikën e “kulaçit dhe kërbaçit”. Qeveria e Merkel nuk ka pranuar asnjë aplikim për azil nga qytetarët shqiptarë. Por nga ana tjetër, ajo po furnizon me grante qeverinë shqiptare, e cila duhet të sigurojë punësimin e këtyre personave që riatdhesohen. Pak javë më parë, Parlamenti i Shqipërisë miratoi pranimin e grantit të dytë nga qeveria gjermane, në shumën 1.6 milionë euro, e cila është e destinuar për krijimin e kurseve profesionale për personat e rikthyer.
Qëndrim më ekstrem ka shprehur Hollanda. Një vend me potencial më të ulët ekonomik se Gjermania, zyrtarë hollandez kanë hedhur idenë e rikthimit të vizave për shqiptarët, në tentativë për frenimin e numrit të lartë të azil-kërkuesve, i cili është shoqëruar me rritjen e kriminalitetit në këtë vend.
