Paris Saint – Germain nuk po kalon një moment të mirë pavarësisht se në kampionat vazhdon të jetë kryesues dhe shumë pranë titullit kampion.
Humbja dhe eliminimi nga Real Madrid në Ligën e Kampionëve dhe dëmtimi i Neymar ishin dy goditje të rënda për trajnerin Emery dhe drejtuesit e klubit.
Eliminimi nga Champions League ka bërë që drejtuesit e ekipit të nisin për të ndryshuar disa gjëra për vitin që vjen.
Një nga vendimet e mundshme që mund të bëjnë, sipas të përditshme franceze “L’Equipe” është edhe shitja e Marco Verrattit.
Gazeta në fjalë shkruan se agjenti i ri i mesfushorit italian, Mino Raiola mendohet të ketë ofruar lojtarin te Barcelona. Presidenti i PSG-së, Nasser Al -Khelaifi do të jetë i gatshëm për të negociuar me gjigantët katalanas për një shifër afër 100 milionë euro, e njëjtë me atë që francezët refuzuan vitin e kaluar.
Megjithatë përgjigja e klubit blaugran ishte e ftohtë, sidomos pas blerjes së Arthur. Lojtari është konsideruar si një përforcim që nevojitej në mesfushën e trajnerit Ernesto Valverde.
