Qeveria shqiptare do të falë kreditë e dhë- na ndaj 1084 familjeve, të cilat i kanë përfituar ato nga Enti Kombëtar i Banesave, por që nuk janë shlyer për shkak të përmbytjeve. Kjo falje do të realizohet nëpërmjet miratimit të projektligjit të ri për strehimin social.
Pjesë e kredive që do të falen nga qeveria janë dhe për familjet, që janë shpërngulur për shkak të ndërtimit të veprave publike, si Hidrocentrali i Fierzës apo ai i Banjës. Në dispozitat transitore të këtij projektligji parashikohet pikërisht në nenin 80, ku janë përcaktuar dispozitat transitore të kësaj nisme.
“Familjeve të shpërngulura për shkak të ndërtimit të veprave publike dhe kategorive të tjera në pamundësi financiare, të cilat kanë përfituar kredi nëpërmjet Entit Kombëtar të Banesave, u falen detyrimet monetare, sipas përcaktimeve në vendimin e Këshillit të Ministrave”, thekson projektligji i qeverisë.
Në relacionin e projektligjit theksohet se përfituesit e faljes së kredive nga Enti Kombëtar i Banesave janë kryesisht në qytetet e Lezhës, Tiranës dhe Durrësit. Në total bëhet fjalë për 723 familje, që do të përfitojnë nga ky proces. Ndërsa në gjashtë qytete të tjera të vendit do të përfitojnë familjet që janë prekur nga përmbytjet.
Sipas të dhënave të qeverisë, në Shkodër janë 177 familje që kanë marrë kredi nga Enti Banesave, por që janë dëmtuar për shkak të përmbytjeve. Qyteti tjetër që është prekur më shumë nga përmbytjet është Lezha, që sipas projektligjit, do të falen 94 familje nga kreditë.Qytetet e tjera përfituese janë Elbasani, Hasi, Fieri dhe Tirana.
