6 kompanitë e licensuara për asgjësimin e mbetjeve spitalore, po hetohen nga Prokuroria e Tiranës për dyshimet se disa prej tyre shkelin ligjin.
Dyshohet se mbetjet spitalore në përbërje të të cilave ka mbetje të rrezikshme organike që dalin nga sallat e operacioneve apo edhe lëndë të ndryshme kimike, nuk asgjësohen siç përcakton rregulli, por ato hidhen në sheshe të hapura duke rrezikuar përhapjen e sëmundjeve.
Kompanitë kanë fituar tenderat për të grumbulluar mbetjet spitalore, nga spitalet publike dhe qendrat shëndetësore. Sipas ligjit ato paguhen që këto mbetje t’i asgjësojnë me anë të djegies në temperatura shumë të larta, e më pas bëhet depozitimi në landfille me procesverbale të posaçme.
Prokuroria ka dyshime se proçedura anashkalohet nga disa nga kompani të licensuara. Ndërkohë që njëra prej tyre ka bërë edhe denoncim pranë prokurorisë, e cila ka nisur hetimin bazuar në nenin 281 të Kodit Penal që flet për shkeljen e rregullave me lëndët helmuese dhe që parashikon dënimin nga gjobë deri në dy vjet burgim.
Ky është parashikimi më i lehtë ligjor pasi nëse vërtetohet të ketë ndodhur diçka e tillë, për shkak se mbetjet spitalore konsiderohen të rrezikshme dhe kjo vepër dënohet me 10 vite burg.
Hetimi i nisur në muajin nëntor të vitit 2017 drejtohet nga prokurori Julian Zonja. Në Shqipëri veprojnë gjashtë kompani në këtë fushë, një prej të cilave u penalizua se u gjet me shkelje. Prokuroria ka pyetur të gjithë administratorët e këtyre kompanive, ndërkohe që nuk përjashtohen nga hetimi edhe tenderat e dhënë këtyre kompanive nga spitalet shtetërore dhe disa klinika.
Një kontenier me mbetje spitalore, është shumë i rrezikshëm dhe nuk mund të krahasohet me mbetjet urbane. Aty ndodhen mbetjet që dalin nga sallat e operimit të cilat duke u përhapur në tokë apo ujëra, lumenj apo bregun e detit kthehen në ushqim për kafshët e peshqit të cilat me pas infeksionet e rënda i transmetojnë te njerëzit
