Vendoset masa e sigurisë “Arrest me burg” për Adriatik Bakiasin, oficerin e policisë së arrestuar një ditë më parë nga SHÇBN (Shërbimi për Çështjet e Brendshme dhe Ankesat në Ministrinë e Brendshme, nën dyshimin se dekonspiroi mega-operacionin e koduar “One-if-by land” , që çoi në goditjen e 7 grupeve kriminale të cilët nëpërmjet pasaportave false çonin klandestinë shqiptarë në SHBA, Kanada dhe Angli.
Që prej të premtes në darkë, forcat e policisë kishin marrë nën vëzhgim banesat e shtetasve, gjatë kohës që ata vëzhgonin banesën e shtetasit Fuat Zaimi, vërejnë një person identiteti i tij ende nuk është bërë i ditur i cili thotë: “Ik se do të kapin.
Në momentin që Fuati tenton për tu larguar nga banesa, forcat operacionale ndërhyjnë dhe e arrestojnë atë bashkë me personin i cili e paralajmëroi. Pasi ata u shoqëruan në polici, ishte pikërisht lajmësi i Fuatit ai që tha se e kishte dërguar oficeri Adriatik Bakiasi për ta lajmëruar. Nga verifikimet e kryera del se ky person ka edhe një person të afërt familjar në skuadrën operacionale. Vazhdojnë hetimet nëse ka persona të tjerë të përfshirë në dekonspirim.
