Në Gjykatën e Krimeve të Rënda është zhvilluar sot gjyqi ndaj ish-drejtorit të Brugjeve, Artur Zoto. Ai është tërhequr nga kërkesa për të pyetur si dëshmitar ish-ministrin e Drejtësisë, Ylli Manjani. Zoto paraqiti një kërkesë për zëvendësimin e kësaj mase, ndërsa gjykata u tërhoq për të marrë vendim.
Gjatë shqyrtimit të provave të Prokurorisë, për të parën herë u bë publik fakti se kur është kontrolluar banesa e të pandehurit Iliaz Labi, ish-zv.Drejtor i Burgjeve, i është gjetur një armë pa leje. Labi është njëkohësisht nën akuzë për armëmbajtje pa leje dhe për korrupsion. Ndërkohë mësohet se Labi ka bërë marrëveshje me Prokurorinë si dëshmitar i mbrojtur.
Gjykata e krimeve të rënda rrëzoi kërkesën e Artur Zotos për lirimin e tij, përmes ndryshimit të masës së sigurisë “arrest me burg”. Ish drejtori i burgjeve, që akuzohet për korrupsion, do të vazhdojë të qendrojë në qeli. Në seancën e sotme gjykata administroi provat shkresore të prokurorise. Mes tyre janë edhe praktika e tenderimit për furnizimin e burgjeve me ushqimeve, tender i datës 31 maj 2016. Po ashtu u administruan dhe procesverbalet e vëzhgimeve ambientale dhe telefonike.
